Sex mánaða gamalt barn, sem var bjargað úr báti með flóttafólki við Kanaríeyjuna El Hierro, er látið. Barnið hafði verið flutt lífshættulega veikt á sjúkrahús á Tenerife eftir að hafa fengið hjartastopp þegar báturinn kom að landi.

Samkvæmt stjórnvöldum á Kanaríeyjum tókst viðbragðsaðilum að endurlífga barnið á bryggjunni í La Restinga áður en það var flutt með þyrlu á háskólasjúkrahúsið Nuestra Señora de Candelaria á Tenerife. Barnið lést síðar í gær.

Þetta er annað dauðsfallið sem tengist bátnum. Við björgunaraðgerðir fannst einnig lík konu sem samferðafólk hennar greindi sem Binta Colly.

Báturinn lagði af stað frá Banjul í Gambíu og var um borð fólk frá Senegal, Gambíu, Gíneu og Malí. Hann fannst skammt undan El Hierro 22. júlí með 165 farþega innanborðs, þar af 110 karla, 42 konur og 13 börn, þar á meðal fjögur ungbörn.

Farþegarnir höfðu verið ellefu daga á siglingu yfir Atlantshafið við afar erfiðar aðstæður. Ástand margra var alvarlegt þegar þeir komu að landi og þurftu 23 tafarlausa læknisaðstoð. Af þeim voru 15 lagðir inn á sjúkrahús, þar á meðal sex mánaða barnið.

Atvikið varpar enn á ný ljósi á þá miklu hættu sem fylgir því að reyna siglinguna yfir Atlantshafið til Kanaríeyja, sem er talin ein mannskæðasta flóttaleið heims.