Kvikmyndagerðarmaðurinn Sigursteinn Másson gagnrýnir harðlega vaxandi áhrif hægri popúlisma og andúð á innflytjendum, flóttafólki og minnihlutahópum bæði erlendis og á Íslandi í færslu sem hann birti á Facebook í gær.

Sigursteinn bendir á að yfir hundrað þúsund manns hafi safnast saman í London til að mótmæla innflytjendastefnu breskra stjórnvalda, þar sem meðal annars Elon Musk hafi tekið til máls klæddur þjóðfánanum og með MAGA-derhúfu. Hann kallar atburðinn „súrrealískan og fáránlega súran“.

„Hver popúlistahreyfingin á fætur annarri sprettur upp og sópar til sín fylgi vestan hafs og austan í nafni andstöðu við innflytjendur, flóttafólk, múslima og transfólk,“ skrifar hann og spyr hve margir þessara stuðningsmanna hafi í raun persónulega neikvæða reynslu af þeim hópum sem þeir mótmæla.

Ísland sé ekki undanskilið þessari þróun, að hans mati. „ Hér á Íslandi er talað um tiltekt í útlendingamálum eins og það þurfi bara að sópa þessu liði einhvern veginn út í horn eða bara í burtu,“ segir hann og bendir á mikilvægi innflytjenda fyrir atvinnulíf og byggðaþróun. Hann nefnir að atvinnuþátttaka flóttafólks sé í raun meiri en þeirra sem eru fæddir hér á landi, þrátt fyrir að stjórnmálamenn tali um flóttamenn sem byrði.

Sigursteinn bendir einnig á ábyrgð Vesturlanda á neyðarástandi í ríkjum eins og Írak, Afganistan og Palestínu. Hann spyr hvort Íslendingar ætli að snúa baki við þeim sem séu í mestri neyð, ekki síst afgönskum konum.

Hann hafnar einnig rökum sem byggja á því að innflytjendur auki glæpatíðni: „ Þegar öll rök eru á þrotum er gripið til þess ráðs að kenna innflytjendum um aukna glæpatíðni. Aftur eru engin haldbær gögn eða tölfræði sem styður það. Auðvitað aukast glæpir eitthvað með auknum fjölda fólks, það segir sig sjálft, en það er helst þegar fólk hefur verið niðurlægt og jaðarsett, hefur færri tækifæri en aðrir sem að hætta er á að það fari á einhvern hátt út af sporinu.“ Því sé það óskiljanlegt að stjórnvöld ætli að draga úr fjárframlögum til íslenskukennslu fyrir útlendinga.

Að lokum gagnrýnir Sigursteinn það sem hann kallar „kristilega hægri menn“ og spyr hvort menn sjái Jesú Krist fyrir sér á samkomu þar sem úthúðað er minnihlutahópum.

„Hvað varð um mennskuna og mannúðina? Hvernig snúum við þessari öfugþróun við?“ spyr Sigursteinn að lokum.