Skúli Steinar Pétursson, öflugur baráttumaður fyrir réttindum fatlaðs fólks, lést 22. júlí síðastliðinn, 39 ára að aldri, að því er fram kemur í umfjöllun mbl.is.

Skúli fæddist 17. október 1986 og ólst upp í Garðabæ. Að loknu námi frá Fjölbrautaskólanum í Garðabæ beitti hann sér fyrir auknum möguleikum fólks með þroskahömlun til háskólanáms. Hann vakti athygli á málinu með greinaskrifum og erindum og skömmu síðar var komið á fót starfstengdu diplómanámi fyrir fólk með þroskahömlun við Háskóla Íslands.

Hann lét mikið til sín taka í réttindabaráttu fatlaðs fólks, sat meðal annars í stjórnum Þroskahjálpar og Átaks og starfaði sem sendiherra samnings Sameinuðu þjóðanna um réttindi fatlaðs fólks. Þá tók hann þátt í sjónvarpsþáttunum Með okkar augum um árabil.

Skúli starfaði lengi hjá IKEA og áður á dvalar- og hjúkrunarheimilinu Holtsbúð. Hann var einnig afreksmaður í sundi, varð tvítugfaldur Íslandsmeistari og Norðurlandameistari árið 2007. Árið 2023 keppti hann fyrir Íslands hönd á heimsleikum Special Olympics.

Útför Skúla Steinars fer fram frá Vídalínskirkju fimmtudaginn 6. ágúst klukkan 13.00.