Skúli Tómas Gunnlaugsson læknir segir sér að meinalausu að mál hans fari fyrir dóm og kveðst telja að sannleikurinn muni þar koma fram. Landsréttur ógilti nýverið frávísunarúrskurð Héraðsdóms Reykjaness og verður ákæra á hendur honum því tekin til efnismeðferðar.
Skúli Tómas var ákærður fyrir manndráp og brot á lögum um heilbrigðisstarfsmenn vegna andláts konu sem lést í umönnun hans á Heilbrigðisstofnun Suðurnesja árið 2019.
Embætti landlæknis svipti hann lækningaleyfi árið 2021 þegar hann hafði stöðu grunaðs vegna fleiri andláta á stofnuninni. Önnur mál voru síðar felld niður og aðeins ákært vegna eins andláts.
Í færslu á Facebook segir Skúli Tómas málið ekki snúast um að komast hjá dómsmeðferð heldur að sannleikurinn fái að koma fram. Hann hafnar alfarið ásökunum á hendur sér og segir hvorki glæp né gáleysi hafa átt sér stað.
Skúli Tómas gagnrýnir jafnframt málatilbúnað ákæruvaldsins og telur að skort hafi á skilning á læknisfræðilegum þáttum málsins. Hann segir frumgögn, gagnreynda læknisfræði og framburð fjölda vitna styðja málstað sinn.
Þá gagnrýnir hann fréttaflutning um málið, sem hann telur hafa verið einhliða, og þakkar samstarfsfólki, kollegum, vinum og fjölskyldu fyrir stuðning undanfarinna ára.
