Í dag sameinast vörumerkin Vodafone, Stöð 2, Stöð2+ og Stöð 2 Sport undir merki Sýnar en greint er frá þessu í tilkynningu frá fyrirtækinu. Um sögulega breytingu er að ræða en nafn Stöðvar 2 hefur verið notað frá 1986.
Sýn segir að þessi samruni sé mikilvægur þáttur í því að einfalda ásýnd og vöruframboð Sýnar í anda þeirrar stefnumörkunar sem félagið kynnti á mörkuðum í lok síðasta árs.
Mannlíf greindi frá þessum breytingum í febrúar en gengi fyrirtækisins á hlutabréfamarkaði hefur fallið mikið á undanförnum 18 mánuðum. Þá hafa hafa tugir starfsmanna hætt eða þeim verið sagt upp á sama tímabili.
Breytingar hjá fyrirtækinu
- Sýn er nýtt aðalheiti félagsins sem kemur í stað Vodafone og Stöðvar 2. Öll þjónusta fyrirtækisins verður aðgengileg á vefnum syn.is.
- Fjarskiptaþjónusta er hér eftir veitt í nafni Sýnar í nánu samstarfi við Vodafone Group á alþjóðavísu sem tryggir áfram öfluga vöruþróun, innviði og aðgang að alþjóðlegri þekkingu.
- SÝN er nýtt heiti á línulegu sjónvarpstöðinni Stöð 2. Þar verður áfram hægt að horfa á hágæða sjónvarpsefni, innlent og erlent sem og kvöldfréttir alla daga ársins.
- SÝN+ er nýtt heiti á streymisveitunni Stöð 2+ sem býður upp á fjölda íslenskra og erlendra þáttaraða, vandað talsett barnaefni og gott úrval kvikmynda.
- SÝN Sport er nýtt heiti á Stöð 2 Sport og mun stöðin áfram bjóða upp á besta sætið í heimi íþrótta - og er enski boltinn þar á meðal.
- Fréttastofa Sýnar er nýtt heiti á Fréttastofu Vísis, Stöðvar 2 og Bylgjunnar sem heldur áfram að flytja fréttir á Vísi, sjónvarpsstöðinni Sýn og Bylgjunni.
Útvarpsstöðvarnar Bylgjan, FM957 og X977 halda sínum nöfnum óbreyttum eins og fréttamiðillinn Vísir. Vörumerki þeirra verða þó aðlöguð að vörumerkjastefnu Sýnar samkvæmt tilkynningunni.
