Héraðsdómur Reykjaness hefur sýknað fyrirtæki sem rekur baðlón af kröfu fyrrverandi starfsmanns um viðurkenningu á skaðabótaskyldu vegna vinnuslyss sem hún varð fyrir í lok árs 2021 þegar hún rann á blautu gólfi í búningsklefa og hlaut heilahristing.
Konan höfðaði málið í október 2025 og krafðist þess að viðurkennt yrði að vinnuveitandinn bæri ábyrgð á líkamstjóni sem hún varð fyrir 30. desember 2021. Samkvæmt frásögn hennar var hún að sækja vaðskó áður en hún fór út í lónið þegar hún rann á blautum flísum, féll í gólfið og rak höfuð, öxl og mjöðm í skáp.
Í kjölfar slyssins leitaði hún læknisaðstoðar og greindist með heilahristing. Hún lýsti því að hafa glímt við langvarandi einkenni, meðal annars höfuðverki, svima, þreytu, minnisskerðingu, ljós- og hljóðfælni, kvíða og þunglyndi. Sjúkratryggingar Íslands og launþegatrygging vinnuveitandans höfðu áður viðurkennt bótaskyldu og konan fékk greiddar bætur úr tryggingunni.
Stefnandi hélt því fram að gólf í búningsklefanum hefðu verið óforsvaranlega hál og að stjórnendur hefðu lengi vitað af vandanum án þess að grípa til fullnægjandi úrbóta. Fyrrverandi starfsmenn báru fyrir dómi að starfsmenn hefðu ítrekað bent á slysahættu vegna blautra gólfa og að rætt hefði verið um að leggja mottur á gólfið, en það hefði ekki verið gert.
Fyrirtækið hafnaði ábyrgð og vísaði meðal annars til þess að gólfefnið uppfyllti gildandi kröfur og að reynt hefði verið að draga úr slysahættu með reglulegri þurrkun gólfa, sérstökum efnum á flísum og viðvörunarskiltum.
Dómurinn féllst á að bleyta og hálka væru eðlilegur fylgifiskur starfsemi baðlóns og að ekki yrði gerð sú krafa að útiloka mætti alla fallhættu. Þá taldi dómurinn að stefnandi hefði ekki sýnt fram á að flísarnar uppfylltu ekki lögbundnar öryggiskröfur eða að vinnuveitandinn hefði sýnt af sér saknæma vanrækslu.
Þótt fyrirtækið hefði ekki tilkynnt slysið til Vinnueftirlitsins innan lögboðins frests taldi dómurinn að sú vanræksla hefði ekki haft áhrif á sönnunarstöðu málsins. Var fyrirtækið því sýknað af kröfum konunnar.
