Stefán Ásgrímur Sverrisson hefur verið dæmdur í níu mánaða skilorðsbundið fangelsi í Héraðsdómi Norðurlands vestra fyrir fjársvik gegn bróður sínum vegna óleyfilegra úttekta af viðskiptareikningi hans hjá Kaupfélagi Skagfirðinga. Auk þess var honum gert að greiða bróður sínum rúmar 6,3 milljónir króna ásamt vöxtum og málskostnaði.
DV greindi frá málinu.
Samkvæmt dóminum tók Stefán út vörur í alls 302 skipti á árunum 2016 til 2021 hjá þremur fyrirtækjum í eigu Kaupfélags Skagfirðinga; Skagfirðingabúð, Bifreiðaverkstæði KS og Byggingarvöruversluninni Eyri. Úttektirnar voru skuldfærðar á viðskiptareikning bróður hans án heimildar og námu samtals um 6,3 milljónum króna.
Í niðurstöðu dómsins kemur fram að engin skrifleg gögn hafi verið lögð fram sem sýndu fram á að Stefán hefði haft samþykki bróður síns fyrir öllum úttektunum. Þá hafi millifærslur frá bróðurnum til Stefáns dregið úr trúverðugleika skýringa hans um að úttektirnar hefðu verið greiðsla fyrir aðstoð við bústörf. Dómurinn taldi jafnframt ekkert benda til þess að umfang þeirrar aðstoðar hefði réttlætt þá fjárhæð sem tekin var út.
Einnig var vísað til samskipta Stefáns við bróður sinn og mágkonu á samfélagsmiðlum sem þóttu benda til þess að hann hefði viðurkennt skuldina. Dómurinn taldi því sannað að Stefán hefði vísvitandi nýtt sér rangar eða óljósar hugmyndir starfsmanna um heimild sína til skuldfærslna og þar með gerst sekur um fjársvik samkvæmt hegningarlögum.
