Heilbrigðisráðuneytið og Heilbrigðisstofnun Suðurlands (HSU) hafa sent frá sér tilkynningu þar sem brugðist er við fréttaflutningi RÚV um fyrirhugaðar breytingar á hjúkrunarþjónustu á Selfossi. Þar kemur fram að rangt hafi verið að draga þá ályktun að 20 hjúkrunarrými á Suðurlandi muni leggjast niður.
Í tilkynningunni segir að um mitt næsta ár sé gert ráð fyrir að fyrsti áfangi framkvæmda við endurbætur og viðbyggingu húsnæðis HSU á Selfossi hefjist. Markmið verkefnisins sé að bæta aðstöðu, efla þjónustu og skapa betri umgjörð fyrir sjúklinga, íbúa og starfsfólk.
Þegar framkvæmdir hefjast verður hjúkrunardeildinni Ljósheimum, þar sem eru 20 hjúkrunarrými, lokað og starfsemi heilsugæslunnar flutt í húsnæðið. Engar breytingar verða hins vegar á rekstri hjúkrunardeildarinnar Fossheima.
Fram kemur að þegar nær dregur lokun Ljósheima verði hætt að taka við nýjum íbúum þegar rými losna. Núverandi íbúum verði boðið að flytjast á önnur hjúkrunarheimili, þar á meðal Fossheima, Móberg á Selfossi eða Ás í Hveragerði, í samráði við óskir þeirra og aðstandenda.
Stjórnvöld segjast leggja áherslu á að hjúkrunarrýmum á Suðurlandi muni ekki fækka þrátt fyrir lokun Ljósheima. Nýtt hjúkrunarheimili Áss í Hveragerði verður tekið í notkun um mitt næsta ár og mun bæta við 26 nýjum hjúkrunarrýmum.
Jafnframt er bent á að forgangur Landspítala að rýmum á Móbergi hafi verið afnuminn eftir opnun nýrra hjúkrunarrýma á höfuðborgarsvæðinu. Því muni fleiri rými á Móbergi standa íbúum Suðurlands til boða en áður.
