Mikið hefur verið sagt og skrifað um Ársæl Guðmundsson, skólameistara Borgarholtsskóla, en greint var frá því fyrr í desember að hann fengi ekki skipunartíma sinn framlengdan.

Ársæll kennir Flokki fólksins um starfslok sín og vísar í „skómálið“ svokallaða en þá hringdi Inga Sæland, félags- og húsnæðismálaráðherra, í Ársæl vegna skópars sem barnabarn hennar týndi.

Einn af þeim sem hefur tjáð sig um málið er sagnfræðingurinn og varaborgarfulltrúinn Stefán Pálsson en hann segir að gefin hafi verið út skipun í lokuðu spjallsvæði Samfylkingarinnar að níða ætti skóinn af skólameistaranum með það fyrir augum að verja Flokk fólksins.

Mannlíf sendi Guðmundi Ara Sigurjónssyni, þingflokksformanni Samfylkingarinnar, fyrirspurn um málið fyrr í vikunni. Guðmundur hefur hins vegar ekki svarað fyrirspurninni.

Ljóst er að deilur um skólameistarann munu halda áfram og hefur Sigmundur Davíð Gunnlaugsson, formaður Miðflokksins og fyrrverandi forsætisráðherra Íslands, lagt til að málið verði tekið fyrir á Alþingi.