Lögreglan á höfuðborgarsvæðinu varar við sífellt þróaðri fjársvikum þar sem svikarar hringja í fólk og þykjast vera starfsmenn tæknifyrirtækisins Microsoft.

Í tilkynningu lögreglu segir að svikin hafi verið viðvarandi um nokkurt skeið en að nú hafi orðið breyting á aðferðum brotamanna. Þeir noti nú íslensk símanúmer og talgervla sem tali íslensku við þá sem hringt er í, þannig að símtölin virðist koma frá Íslandi og virki trúverðugri fyrir viðtakendur.

Samkvæmt lögreglu hefjast svikin gjarnan á því að hringt er í einstakling og honum sagt að eitthvað sé að tölvu hans. Í framhaldinu er viðkomandi leiddur í gegnum ferli þar sem settur er upp búnaður eða aðgangur að tölvu hans. Með því fá brotamenn aðgang að upplýsingum og geta komist yfir fjármuni fórnarlamba sinna.

Lögreglan hvetur þá sem telja sig hafa orðið fyrir svikum af þessu tagi til að hafa tafarlaust samband við sinn viðskiptabanka til að fá ráðgjöf og bregðast við mögulegu tjóni. Þá er jafnframt bent á að mikilvægt sé að tilkynna málið til lögreglu.

Einnig minnir lögreglan á netbrotagáttina á island.is þar sem bæði er hægt að tilkynna netbrot og tilraunir til slíkra brota undir liðnum „Samfélag og réttindi“.