Janúarmánuður var með öllu snjólaus í Reykjavík, sem telst afar óvenjulegt að sögn Einars Sveinbjörnssonar veðurfræðings. Hann greinir frá þessu í Facebook-færslu þar sem hann fer yfir snjófar í höfuðborginni og setur núverandi vetur í sögulegt samhengi.
„Í nýliðnum janúar mældist enginn snjór í Reykjavík. Hann var því snjólaus með öllu!“ skrifar Einar og bendir á að þótt slíkt sé fátítt hafi það þó gerst áður. „Það er fátítt að janúar sé alauður í Reykjavík, en hefur þó komið fyrir áður. Reyndar er langt um liðið. Eftir því sem ég kemst næst var svipað upp á teningnum 1929 og 1940.“
Hann nefnir einnig að í janúar 1961 og aftur árið 2002 hafi aðeins mælst einn alhvítur dagur í hvorum mánuði. Að sögn Einars var síðast alhvít jörð í Reykjavík 16. desember síðastliðinn, og einnig föl daginn þar á undan. „Það voru einu dagarnir með snjó í desember,“ skrifar hann.
Veturinn er skilgreindur sem tímabilið frá desember til mars og er því nú rúmlega hálfnaður. Einar rifjar upp veturinn 1976–77, sem var óvenju snjóléttur í höfuðborginni. „Þá mánuði 1976-77 var óvenju snjólétt í höfuðborginni og aðeins 5 alhvítir dagar í heild sinni.“
Að hans sögn hafa alhvítir dagar í Reykjavík aðeins verið tveir það sem af er þessum vetri. „Þennan veturinn eru þeir aðeins tveir (mikla fannkoman 27. október tilheyrir haustinu),“ skrifar hann og bætir viðr„ég tel ólíklegt að það snjói næstu 7 til 10 dagana.“
Einar undirstrikar þó að óvissa sé enn um framhaldið
„Ómögulegt er að segja hvað gerist eftir miðjan mánuðinn og þá er mars allur eftir,“ skrifar hann og bætir við að þrátt fyrir það sé veðurfarið undanfarið óvenjulegt. „En tíðarfarið að undanförnu er samt óvenjulegt í alla staði! Meira um það síðar.“
