Lögregla hafði í gær og nótt afskipti af fjölda ökumanna vegna ýmissa umferðarlagabrota, þar á meðal hraðaksturs, aksturs undir áhrifum áfengis og fíkniefna, auk aksturs án gildra ökuréttinda.

Einn ökumaður var stöðvaður við akstur án gildra réttinda og á yfir höfði sér sekt. Þá voru nokkrir ökumenn kærðir fyrir hraðakstur. Meðal annars mældist ökumaður á 110 km/klst þar sem hámarkshraði er 80 km/klst. Annar mældist á 112 km/klst þar sem hámarkshraði er 90 km/klst, þriðji á 111 km/klst á 80 km/klst svæði og fjórði á 71 km/klst þar sem hámarkshraði er 40 km/klst.

Lögregla hafði einnig ítrekuð afskipti af ökumönnum sem grunaðir voru um akstur undir áhrifum fíkniefna. Í nokkrum tilvikum reyndust ökumenn einnig sviptir ökuréttindum og í einu tilfelli fannst fíkniefni í fórum ökumanns. Þeir voru látnir lausir að lokinni sýnatöku. Þá var einn ökumaður handtekinn vegna gruns um akstur undir áhrifum áfengis en sleppt að lokinni sýnatöku.

Tilkynnt var um umferðaróhapp þar sem ökumaður ók á húsnæði með þeim afleiðingum að rúða brotnaði. Málið er til rannsóknar. Í öðru umferðaróhappi reyndist ökumaður ölvaður og var hann handtekinn og vistaður í fangageymslu vegna rannsóknar málsins.

Lögregla fjarlægði jafnframt sex skráningarmerki af ökutækjum vegna vanrækslu á aðalskoðun eða tryggingum.

Þá var tilkynnt um innbrot í verslun í Árbænum. Gerandi yfirgaf vettvang en fannst skömmu síðar og var vistaður í fangageymslu í þágu rannsóknar málsins.