Jacob Wood, sem um árabil hefur búið á Íslandi, segir óhefðbundið uppeldi sitt hafa kennt sér að lifa í takt við náttúruna og takast á við lífið frá unga aldri. Hann er nýjasti gestur Sölva Tryggvasonar í hlaðvarpi hans og ræðir þar meðal annars æsku sína, lífsbaráttuna á Hawaii og áhuga sinn á heildrænni heilsu.
Jacob er giftur Tinnu Sif Sigurðardóttur en þau kynntust á kennaranámskeiði í Acro-Yoga í Kanada. Hann segir foreldra sína hafa verið mikla hippa og fjölskyldulífið frábrugðið því sem flest börn þekkja.
„Sagan mín er talsvert óhefðbundin og uppeldið sem ég fékk var ólíkt því sem flestir þekkja,“ segir Jacob.
Eftir að foreldrar hans skildu flutti móðir hans með börnin til Hawaii. Fjölskyldan hafði lítið á milli handanna og að sögn Jacobs varð hún heimilislaus eftir að móðirin hætti að fá félagslega aðstoð. Yngstu börnin gátu dvalið með móður sinni í tjaldi en eldri systkinin þurftu að mestu að bjarga sér sjálf.
Jacob segir tímann hafa einkennst bæði af miklu frelsi og daglegri lífsbaráttu. Hann veiddi meðal annars fisk með spjóti til að afla matar og fjölskyldan sótti ávexti út í náttúruna.
„Það var enginn matur nema einn dag í einu og oft fór ég og veiddi fiska með spjóti og náði þannig að fæða sjálfan mig og fjölskylduna,“ segir hann.
Þrátt fyrir erfiðar aðstæður lítur Jacob á reynsluna sem mikilvægan hluta af mótun sinni. Hún hafi kennt honum að bjarga sér og að lífið þurfi ekki að vera jafn flókið og fólk geri það gjarnan.
„Við lifum allt of mikið í kvíða fyrir framtíðinni, í stað þess að vera í núinu,“ segir Jacob.
Jacob og Tinna hafa á undanförnum árum kennt Acro-Yoga bæði hér á landi og erlendis. Þau hafa jafnframt lagt áherslu á að afla sér þekkingar á heildrænni heilsu, samböndum, nánd og líkamsvitund.
Tinna hefur sérhæft sig í líkamsmiðaðri markþjálfun en Jacob hefur í sinni vinnu blandað saman markþjálfun, jóga og nuddi. Hann segir markmiðið vera að nálgast hvern einstakling á heildrænan hátt og skapa aðstæður fyrir varanlegar breytingar.
Þau hafa einnig lagt áherslu á líkamsvitund og hvernig skömm og samfélagsleg viðmið geti haft áhrif á samband fólks við eigin líkama.
„Líkaminn er magnað fyrirbæri, en samt hugsum við oft illa um hann, bæði hvað snýr að hreyfingu, mataræði og svefni, en líka með gagnrýnum hugsunum okkar,“ segir Jacob.
Hann telur að með aukinni líkamsvitund og jákvæðara sambandi við eigin líkama verði auðveldara fyrir fólk að átta sig á eigin þörfum og hlúa betur að heilsunni.
