Albanski popparinn Shpat Kasapi er látinn, aðeins 40 ára gamall, eftir skyndilegt hjartastopp. Tónlistarmaðurinn, sem var staddur í Monza á Ítalíu, er sagður hafa fengið hjartaáfall og andast í örmum eiginkonu sinnar, Selvije Jao. Hjónin voru á Ítalíu til að leita læknisráðgjafar fyrir ungan son þeirra.
Kasapi, sem var albanskur söngvari sem átti fjölda slagara, hafði engin þekkt heilsufarsvandamál og því kom andlát hans fjölskyldu og vinum í opna skjöldu. Í hjartnæmri færslu á Instagram skrifaði Selvije ástarkveðju til eiginmanns síns: „Þú yfirgafst okkur hér alein, án þín.“
Með átakanlegri mynd af Kasapi brosandi og með son þeirra í fanginu, skrifaði hún: „Þú dóst í fanginu á mér. Hversu náin við vorum, hversu samstillt í því að varðveita einkalíf okkar. Þú skildir okkur eftir hér án þín. Þú sagðir alltaf að þú myndir elska mig þar til dauðinn aðskildi okkur. Af hverju dóstu í fanginu á mér? Af hverju braust þú hjartað mitt svona, ástin mín?“
Hún bætti við: „Ég vona að við mætumst á himnum. Guð vildi hafa þig hjá sér, en ég get ekki beðið eftir að vakna úr þessari martröð og finna þig hér hjá okkur aftur.“
Shpat Kasapi var mjög virtur og vinsæll í tónlistarheiminum í Albaníu og Kosovo, að því er Daily Star greinir frá. Frá því ferill hans hófst upp úr aldamótum náði hann miklum vinsældum með lögum eins og Ajo Me Mungon (Ég sakna hennar), Valle Kosovare (Kosóvskt danslag), Dashni Pa Limit (Ást án takmarkana) og Aroma e Saj (Ilmur hennar).
Hann naut mikilla vinsælda eins og áður segir en tónlistarmyndbandið við nýjasta lagið hans, N'dahem Sot, er með nærri eina milljón áhorfa á YouTube og hann var með tæplega 340.000 mánaðarlega hlustendur á Spotify.
Kasapi tók einnig þátt í undankeppni Eurovision fyrir Albaníu árið 2009, þar sem keppt var á milli 20 atriða. Hann komst þó ekki áfram, heldur Kejsi Tola sem flutti lagið Carry Me in Your Dreams fyrir Albaníu í Rússlandi það ár.
Árið 2021 giftist hann Selvije í einkaathöfn eftir að þau kynntust við tökur á einu tónlistarmyndbandi hans. Hjónin bjuggu í höfuðborg Albaníu, Tirana, og áttu son sem heitir Roel.
Izet Mexhiti, borgarstjóri í Çair í Norður-Makedóníu, var meðal þeirra sem minntust Kasapi opinberlega í dag. Í þýddri Facebook-færslu hans segir: „Skyndilegt andlát hans hefur skilið eftir stórt tómarúm hjá fjölskyldu, vinum og öllum þeim sem kunnu að meta list hans. Shpat skilur eftir sig dýrmædda listræna arfleifð og minningar sem munu lifa lengi í hjörtum almennings. Tónlist hans er verðmæti sem fölna ekki. Á þessum erfiða degi vottum við Kasapi-fjölskyldunni, aðstandendum og öllu listasamfélaginu okkar innilegar samúðarkveðjur. Minning hans mun lifa og hann hvíli í friði.“
