Norska Måsøval-fjölskyldan er sögð íhuga að selja sig út úr fiskeldi eftir mikla fjárhagslega erfiðleika sem tengjast rekstri á Íslandi, einkum í gegnum félagið Kaldvík á Austfjörðum. Þetta kemur fram í frétt Austurfréttar.
Samkvæmt umfjöllun norskra miðla hefur fjölskyldan þurft að færa niður verðmæti fjárfestinga sinna um sem nemur tveimur milljörðum norskra króna, eða um 26 milljörðum íslenskra króna, eftir að gengi félagsins lækkaði verulega. Fjárfestingin tengdist uppbyggingu fiskeldis sem ekki hefur gengið sem skyldi.
Kaldvík, sem starfar bæði á Íslandi og í Noregi, hefur séð hlutabréf sín lækka jafnt og þétt undanfarin ár, en staðan versnaði verulega í byrjun árs 2025. Þá féll virði bréfanna skarpt eftir að félagið varaði við slæmri afkomu, meðal annars vegna umfangsmikils dauða seiða og eldisfisks í köldum sjó síðla árs 2024.
Þar sem lífmassi fiskanna er helsta trygging félagsins gagnvart lánadrottnum hafði þetta neikvæð áhrif á fjárhagsstöðu þess. Undanfarna mánuði hefur Kaldvík átt í viðræðum við lánveitendur um aðlögun lánaskilmála og náðist samkomulag í lok mars.
Samkomulagið felur meðal annars í sér rýmkun á skilyrðum um rekstrarafgang og lækkun á kröfum um lausafé. Á sama tíma var gerð krafa um að aðaleigandinn, Måsøval, legði félaginu til nýtt lán upp á um 20 milljónir evra, jafnvirði um þriggja milljarða íslenskra króna.
Á sama tíma hefur fjárfestingafélag fjölskyldunnar hafið endurskoðun á eignasafni sínu, sem hefur ýtt undir vangaveltur um mögulega sölu á fiskeldisstarfseminni. Þá hefur einnig vakið athygli að eigendur norska laxeldisfyrirtækisins SalMar hafi hafið kaup á hlutum í tengdum félögum, sem sumir telja geta verið vísbendingu um mögulega yfirtöku.
Á meðan á þessum sviptingum stendur hefur Kaldvík einnig ráðið nýjan fjármálastjóra. Þórunn Ragnarsdóttir mun taka við starfinu í júlí, eftir að staðan hefur verið tímabundið skipuð frá því í desember.
