Lögreglan á höfuðborgarsvæðinu varar við svikasímtölum sem hafa borist í auknum mæli undanfarið, þar sem notast er við gervigreind til að blekkja fólk. Í símtölunum er hringt úr leyninúmeri og rödd sem búin er til með gervigreind kynnir sig sem „Sigríði Björk“.

Samkvæmt tilkynningu frá Lögreglan á höfuðborgarsvæðinu er í símtölunum fullyrt að um alvarlegt afbrot sé að ræða og viðtakendur spurðir hvort þeir hafi þegar greitt sekt vegna málsins.

Lögreglan ítrekar að þessi símtöl séu svik. Þau séu hvorki frá lögreglunni né frá Sigríði Björk og undirstrikar að lögregla innheimti aldrei sektir í gegnum síma.

Almenningi er bent á að gefa aldrei upp kortanúmer í símtölum og að heimila ekki rafræna auðkenningu nema viðkomandi sé sjálfur eða sjálf viss um að hann eða hún sé að eiga í samskiptum við réttan aðila.

Þeir sem telja sig hafa orðið fyrir svikum og mögulega tapað fjármunum eru hvattir til að hafa tafarlaust samband við sinn viðskiptabanka til að fá ráðgjöf og í kjölfarið tilkynna málið til lögreglu.