Matvælastofnun hefur fengið tilkynningu frá Matvæla- og lyfjaeftirliti Bandaríkjanna (FDA) um að fæðubótarefnið Rosabella Moringa hafi verið innkallað vegna greiningar á sýklalyfjaónæmri salmonellu í vörunni. Varan hefur verið seld í netsölu og meðal annars borist til Íslands.

Um er að ræða Moringa-hylki undir vörumerkinu Rosabella, framleidd af Ambrosia í New York. Innköllunin nær til allra lota með best fyrir dagsetningu frá mars 2027 til nóvember 2027.

Varan hefur verið seld á ýmsum alþjóðlegum netsíðum, þar á meðal eBay, TikTok, Amazon, Shein, Etsy og Tryrosabella.com.

Matvælastofnun hvetur neytendur sem hafa keypt vöruna til að neyta hennar ekki heldur farga henni tafarlaust.

Salmonellusýking getur valdið veikindum 12 til 72 klukkustundum eftir neyslu og standa einkenni yfirleitt í fjóra til sjö daga. Helstu einkenni eru niðurgangur, hiti og magakrampi. Ung börn og eldra fólk eru sérstaklega viðkvæm fyrir sýkingunni.