Matvælastofnun (MAST) varar almenning við því að tína og neyta kræklinga úr fjörum sunnan- og suðvestanlands eftir að eiturþörungar greindust í miklu magni í sjósýnum í árlegum vorleiðangri hjá Hafrannsóknastofnun.
Samkvæmt tilkynningu frá Matvælastofnun fundust eiturþörungarnir bæði í Faxaflóa og fyrir sunnan landið. Tíðarfarið í maí hafi verið hagstætt, sérstaklega á suðvesturhluta landsins, og því sé ástæða til að ætla að aðstæður fyrir vöxt eiturþörunga séu víða góðar.
Viðvörunin nær til allra vinsælla staða þar sem fólk tínir villtan krækling, þar á meðal í Hvalfirði. MAST bendir á að regluleg vöktun á eiturþörungum í sjó takmarkist við virk ræktunarsvæði skelfisks og því sé ekki hægt að tryggja öryggi villts kræklinga sem tíndur er utan þeirra svæða.
Svifþörungar eru mikilvægur hluti af fæðukeðju hafsins, en sumar tegundir þeirra geta myndað eiturefni sem eru skaðleg bæði mönnum og dýrum. Þótt skelfiskur verði ekki sjálfur fyrir áhrifum af eitrinu getur hann safnað því í vefi sína með neyslu eiturþörunga. Neysla slíks skelfisks getur valdið alvarlegum veikindum hjá fólki.
MAST bendir á að vöxtur eiturþörunga og myndun eiturefna sé ófyrirsjáanleg. Hættan geti komið upp hvenær sem er á gróðurtímabili þörunga, sem að jafnaði stendur frá marsmánuði og fram á vetur.
Niðurstöður vöktunar á eiturþörungum og þörungaeitri í skel á ræktunarsvæðum eru aðgengilegar á vef MAST. Þá má einnig nálgast frekari upplýsingar um eiturþörunga og þörungaeitur hjá Hafrannsóknastofnun.
