Héraðsdómur Reykjavíkur hefur gagnrýnt harðlega bæði ákæruvaldið og skipaðan verjanda í fíkniefnamáli vegna vinnubragða við meðferð málsins. Þetta kemur fram í dómi þar sem meðal annars er fjallað um verulegar breytingar sem gerðar voru á ákæru eftir að hún hafði verið gefin út.
Í dómnum segir að ákæruvaldið hafi gert „verulegar breytingar“ á ákærunni sem hafi verið „langt umfram það sem eðlilegt getur talist í málum af þessum toga“. Þá segir að þau vinnubrögð sem leiddu til frávísunarkröfu ákærða hafi verið „verulega ámælisverð“.
Dómurinn tekur þó fram að sá sækjandi sem flutti málið fyrir dómi hafi ekki borið ábyrgð á þeim annmörkum, þar sem hann hafi tekið við málinu eftir útgáfu ákærunnar.
Jafnframt óskaði sækjandi eftir því að dómurinn tæki til skoðunar hvort tilefni væri til að sekta skipaðan verjanda ákærða vegna ummæla sem hann lét falla í greinargerð til dómsins. Þar sagði meðal annars að ekki væri um innsláttarvillu að ræða heldur mistök sem væru „í fullkomnu samræmi við þekkt vinnubrögð sækjandans, sem þykja almennt afar óvönduð“.
Dómurinn taldi að með þessum ummælum hefði verjandinn farið „yfir mörk viðeigandi tjáningar“ og að orðalagið hefði verið „ósæmilegt og til þess fallið að misbjóða virðingu dómsins“. Hins vegar var talið að taka yrði mið af þeim annmörkum sem voru á ákærunni og þeim leiðréttingum sem síðar voru gerðar. Var því ekki talið nægilegt tilefni til sektar, heldur látið nægja að ávíta verjandann.
Þá gagnrýnir dómurinn einnig bæði ákæruvaldið og verjandann fyrir að hafa lagt fram gögn sem tengdust ekki sakarefni málsins heldur meintu vanhæfi fyrrverandi ákæranda og sækjanda í málinu. Segir í dóminum að gögnin hafi hvorki átt erindi inn í málið né tengst ákærða með nokkrum hætti.
„Eru þessi vinnubrögð skipaðs verjanda ákærða og ákæruvaldsins átalin, enda ámælisvert af þeirra hálfu að blanda inn í málið óviðkomandi atriðum sem ekkert komu málinu eða ákærða við,“ segir í niðurstöðu dómsins.
Sakborningurinn, sem játaði sök, var sakfelldur fyrir umferðarlagabrot og brot gegn lögum um ávana- og fíkniefni og dæmdur til að sæta fangelsi í tvo mánuði, skilorðsbundið til tveggja ára. Hann var einnig sviptur ökurétti í 27 mánuði og honum gert að sæta upptöku á fíkniefnum sem haldlögð höfðu verið við rannsókn málsins.
