Stjórn Háskólans á Bifröst hefur gert samkomulag við dr. Vilhjálm Egilsson, fyrrverandi rektor skólans, um að hann taki að sér hlutverk ráðgjafa stjórnar og rektors.
Í hinu nýja hlutverki mun Vilhjálmur veita stjórninni ráðgjöf vegna þeirra verkefna sem fram undan eru. Áhersla verður lögð á að efla samstöðu meðal starfsmanna, styrkja fjármögnun háskólans og vinna að gerð rekstraráætlana. Þá mun hann koma að uppfærslu og þróun gæðastarfs og almennri stefnumótun skólans.
„Ég fagna því sérstaklega að fá Vilhjálm Egilsson til liðs við okkur á þessum tímapunkti. Milli hans og Háskólans á Bifröst er sterk taug og það er mikils virði fyrir okkur að njóta þekkingar hans og reynslu á þeim tímum sem nú fara í hönd í starfi háskólans,“ segir dr. Ólína Þorvarðardóttir, settur rektor Háskólans á Bifröst, í tilefni ráðningarinnar.
Vilhjálmur gegndi embætti rektors Háskólans á Bifröst á árunum 2013 til 2020. Hann hefur jafnframt gegnt fjölmörgum lykilstörfum í íslensku atvinnu- og stjórnmálalífi, meðal annars sem framkvæmdastjóri Samtaka atvinnulífsins, ráðuneytisstjóri í sjávarútvegsráðuneytinu, framkvæmdastjóri Verslunarráðs Íslands og alþingismaður fyrir Norðurlandskjördæmi vestra. Þá sat hann í framkvæmdastjórn Alþjóðagjaldeyrissjóðsins (IMF).
Háskólinn á Bifröst hefur starfað frá árinu 1918 og leggur áherslu á menntun í viðskiptum, lögfræði og félagsvísindum. Skólinn er í fararbroddi í fjarnámi og er allt nám byggt upp sem fjarnám, með það að markmiði að tryggja jafnan aðgang að háskólamenntun óháð búsetu eða öðrum aðstæðum.
