Gömlu fóstbræðurnir Össur Skarphéðinsson, fyrrverandi formaður Samfylkingar, og Ólafur Ragnar Grímsson, fyrrum forseti Íslands, eru komnir í hár saman vegna Evrópusambandsins. Ólafur Ragnar er genginn í lið með Hannesi Hólmsteini Gissurarsyni, fyrrverandi prófessor, og berst með kjafti og klóm gegn því að þjóðin fái að greiða atkvæði um aðild að Evrópusambandinu. Samtökin hafa náð að setja límmiða í sína þágu á stóran hluta af heyrúllum bænda víða um land. Sumir kenna samtökin við rúllurnar.
Össur gefur Ólafi Ragnari ekkert eftir og líkir honum og þeim sem standa að Nei-hreyfingunni við MAGA-hreyfingu Trumps. Össur segir á Facebook að í Bandaríkjunum sé MAGA-hreyfingunni stjórnað af milljóna- og billjónamæringum. Hún ráðist á stofnanir og saki menn um að ganga erinda erlends valds. Með öllum ráðum sé þaggað niður í stofnunum, einstaklingum og fjölmiðlum. Auður sægreifanna íslensku notaður í þágu Nei-hreyfingarinnar.
„Á Íslandi er NEI-hreyfingunni stýrt af auðmönnum eins og Halldóri Benjamín, hálaunaðri verkalýðsforystu sem vill ekki einu sinni leyfa eigin félagsmönnum að skoða möguleika á lækkun matvælaverðs eða verulega lægri vöxtum húsnæðislána – og fulltrúum sem áður sátu efst á tróni stjórnkerfisins,“ skrifar Össur og vísar augljóslega til Ólafs Ragnars. Ólafur Ragnar mætti í Spursmál í gær þar sem hann talaði varlega um Össur en taldi þó að vinur sinn væri að upphefja sig með baráttunni fyrir því að þjóðin fengi að svara til um aðild. Áður hafði forsetinn fyrrverandi gefið í skyn að ríkisstjórnin myndi hugsanlega semja beint um aðildina án aðkomu þjóðarinnar.
Þess er nú beðið hvert verði næsta útspil Ólafs Ragnars og heyrúllusamtakanna í stríðinu um þjóðaratkvæðagreiðslurnar ...
