Búið er að koma fyrir myndavélum á Egilsstaðaflugvelli, svo hægt sé að mynda númeraplötur á bílum sem leggja við völlinn.
ISAVIA ætlar sér að hefja gjaldtöku á bílastæðum á þremur flugvöllum á landsbyggðinni frá og með vorinu en stjórn Sambands sveitarfélaga á Austurlandi krefst þess að hætt verði við gjaldtökuna.
Fram kemur í umfjöllun Austurfréttar, að ISAVIA hafi ákveðið í lok síðasta árs, að hefja gjaldtöku á bílastæðum við flugvellina á Egilsstöðum og Akureyri, snemma á þessu ári. Eftir mótmæli var því frestað en bent var á að ósamræmi væri í að rukka ekki fyrir bílastæði við Reykjavíkurflugvöll, en að auki voru uppi efasemdir um lögmæti gjaldtökunnar.
Þrátt fyrir frestunina er ISAVIA ekki hætt við gjaldtökuna og eru nú komnar upp myndavélalar á Egilsstöðum. „Ég get staðfest að búið er að setja upp myndavélakerfi fyrir bílastæðin við Egilsstaðaflugvöll og Akureyrarflugvöll. Við erum í miðjum undirbúningi á Reykjavíkurflugvelli. Við gerum ráð fyrir að kerfið verði tekið í notkun og gjaldtaka á bílastæðunum við alla þrjá flugvellina hefjist í vor,“ segir í svari Sigrúnar Jakobsdóttir, framkvæmdastjóra ISAVIA innanlandsflugvalla til Austurfréttar.
Sveitastjórnir á Austurlandi mótmæltu gjaldtökunni en stjórn Sambands sveitarfélaga á Austurlandi bókaði á fundi sínum kröfu um að ISAVIA félli algjörlega frá gjaldtökunni. Í bókuninni var efasemdir um lögmæti gjaldtökunnar ítrekaðar en að auki var henni lýst sem mismunun gagnvart íbúum á landsbyggðinni, sem ekki komist hjá því að nota dýrt innanlandsflug til að sækja nauðsynlega þjónustu til höfuðborgarsvæðisins.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir