Einar Steingrímsson, stærðfræðingur, skrifaði pistil sem birtur var á Vísir í gær þar sem hann gagnrýnir skrif Auðar Önnu Magnúsdóttur og starf Kvenréttindafélag Íslands, sem hún fer fyrir.
Í upphafi pistilsins segir Einar að ekkert bendi til þess að Auður eða Kvenréttindafélagið tengist brotum Jeffrey Epstein. Hann skrifar meðal annars:
„Ekkert bendir beinlínis til að Auður Önnu Magnúsdóttir og Kvenréttindafélag Íslands, sem hún er í forystu fyrir, tengist níðingsverkum Jeffrey Epstein, enda virðast Auður og félagið ekki nefnd í þeim skjölum sem birt hafa verið, enn sem komið er. En, ...“
Í framhaldinu gagnrýnir Einar framsetningu í pistli Auðar, sem birtist á Vísi í fyrradag og segir hann nota svokallað „en“-stílbragð. Hann hafnar þeirri aðferð og segir:
„Það er ekkert „en“, þetta er bara stílbragð sem ég lærði af pistli Auðar, fyrir hönd Kvenréttindafélagsins, sem birtist í Vísi í gær, 17. febrúar.“
Einar segir í pistli sínum að Auður hafi í sínum skrifum nafngreint karla sem, að hans mati, hafi ekki verið sýnt fram á að hafi framið refsiverð brot. Hann skrifar:
„Þar nafngreinir hún, eftir inngang um Epstein, nokkra karla sem ekkert hafa til saka unnið svo við getum vitað, nema hvað sumir þeirra viðhöfðu óviðurkvæmileg ummæli um konur, í litlum hópi vina.“
Hann bætir við kaldhæðnislegri athugasemd um persónulega framkomu Auðar:
„Við erum auðvitað sannfærð um að Auður hafi aldrei sagt neitt ljótt um annað fólk í einkasamkvæmum, enda hefur hún sjálf nýlega útskýrt opinberlega hvernig hún er miklu betri manneskja en við hin.“
Síðar í pistlinum setur Einar fram dæmi um hvernig, að hans mati, sams konar rökfærslu mætti beita á Auði og Kvenréttindafélagið, þó hann taki fram að hann mæli ekki með því. Hann skrifar orðrétt:
„Tilgangur þessa pistils er ekki að bera Auði og Kvenréttindafélag Íslands saman við barnaníðshring Epsteins, heldur frekar að undirstrika að það er það sama sem liggur til grundvallar í báðum tilfellum: Manneskjufyrirlitning. Hún birtist hjá Epstein í kvenfyrirlitningu og viðurstyggilegri framkomu við konur, en hjá Auði og Kvenréttindafélaginu í froðufellandi karlhatri.“
Að lokum veltir Einar upp þeirri spurningu hvort stjórnvöld eigi áfram að styðja starfsemi félagsins með opinberu fé. Hann skrifar:
„Sú spurning verður sífellt áleitnari hversu langt ofstækisfemínistar þurfa að ganga áður en hið opinbera hættir að styrkja svona soralegan áróður og persónuníð af almannafé.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir