Lögreglan á höfuðborgarsvæðinu hefur gefið út viðvörun vegna nýrrar bylgju svikapósta sem sendir eru út í nafni Ríkisskattstjóra.
Í tilkynningu lögreglu segir að með þessum pósti sé verið að reyna að fá fólk til að smella á hlekk sem opnar fyrir aðgang að rafrænum skilríkjum. Lögreglan leggur áherslu á að um sé að ræða svik og að póstarnir eigi, líkt og aðrir svikapóstar, að fara beint í ruslið.

Lögreglan hvetur fólk til þess að „vera athugult og kynna sér m.a. ávallt tölvupóstfang sendanda,“ segir í tilkynningu. Sem dæmi nefnir lögreglan að netfangið [email protected] sé algjörlega ótengt Skattinum. Þá birtist ekki vefurinn island.is ef smellt er á hlekkinn.
Auk þess er heimilisfang Ríkisskattstjóra, sem birtist í pósti netþrjótanna, rangt.
Lögreglan ítrekar mikilvægi þess að fólk fylgist vel með slíkum smáatriðum til að forðast að verða fórnarlamb netglæpamanna.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir