Lilja Alfreðsdóttir, mennta-og menningamálaráðherra, hleypir í dag af stokkunum lestrarverkefni fyrir þjóðina þar sem fólk á öllum aldri er hvatt til að nýta tímann sem gefst við núverandi aðstæður í lestur. Verkefnið kallast Tími til að lesa og mun standa til 30. apríl.
Þá eru landsmenn hvattir til að skrá allan sinn lestur á vefsíðunni timitiladlesa.is. Þar geta þátttakendur líka fylgst með sameiginlegum lestri þjóðarinnar frá degi til dags.
Árangurinn verður mældur í tíma. „Og að því loknu munum við freista þess að fá afraksturinn skráðan í Heimsmetabók Guinness,“ segir á vef mennta- og menningarmálaráðuneytisins.
Á vef ráðuneytisins segir einnig að lestur sé sérstaklega mikilvægur fyrir börn þar sem námsárangur barna ræðst að stórum hluta af lesskilningi sem eykst með auknum lestri.
Þar segir einnig að lestur veiti fullorðnum örvandi hvíld frá amstri og áhyggjum dagsins og með lestri aukum við saman veg íslenskrar tungu. „Orðaforði eykst, nýjar hugmyndir kvikna, skilningur á lesmáli batnar og þannig skilningur á heiminum öllum.“
Ef landsmönnum tekst að fá árangur sinn skráðan í Heimsmetabók Guinness yrði það fyrsta heimsmet sinnar tegundar.
Athugasemdir