Guðmundur Felix Grétarsson er gangandi kraftaverk og af honum berast reglulega stórkostlegar fréttir. Tíðindi dagsins er ökuæfing kappans með nýju handleggina sína og birti hann mynd af sér með aðra hönd á stýri.
Eins og flestir líklegast vita voru græddir á Guðmund nýir handleggir þann 14. janúar síðastliðinn, eftir að hann missti þá báða í hræðilegu slysi árið 1998, þá 26 ára gamall:
Sjá einnig: Guðmundur Felix með frábærar fréttir: „Ég get hreyft þennan skratta“
„Ég vann sem rafveituvirki hjá Rafmagnsveitu Reykjavíkur og var að vinna við háspennulínu rétt utan við borgarmörkin. Röð af atvikum og misskilningi verður til þess að ég fer upp í ranga línu og í raun og veru brenni af mér hendurnar,“ sagði Guðmundur fyrir nokkrum árum síðan.
Var það í raun kraftaverk að Guðmundur skyldi lifa slysið af, en hann fékk í sig ellefu þúsund volt og var haldið sofandi í sjö vikur. Nú rúmlega tuttugu árum síðar er Guðmundur kominn með handleggi og hafa framfarir hans farið langt fram úr björtustu vonum.
Sjá einnig: Guðmundur Felix vill sjá gosið og safna hrauni um jólin: „Verð farinn að heilsa með handabandi“
Og nú er hann mættur undir stýri með nýju handleggina sína. Fjölmargir Íslendingar gleðjast fyrir hans hönd vegna þessa nýja áfanga. Frosti nokkur er einn þeirra. „Þvílíkt afrek!,“ segir Frosti.
Guðrún Jóna gleðst líka. „Algjörlega frábært, gangi þér bara vel áfram, það verður gaman að sjá hr Guðna T H hengja orðuna á þig,“ segir Guðrún.
Athugasemdir