Hildur Eir Bolladóttir, prestur í Akureyrarkirkju, greindist nýlega með krabbamein í endaþarmi en hún er nú ein af „70 andlitum Krabbameinsfélagsins“ á afmælisárinu 2021 en félagið mun birta umfjöllun og ljósmyndir af 70 einstaklingum sem glímt hafa við krabbamein á þeim 70 árum sem félagið hefur starfað. Myllumerki verkefnisins er #70andlit.
Á Facebook-síðu Krabbameinsfélagsins gefur Hildur lesendum svolitla innsýn í baráttu sína við krabbameinið en hún hefur í tvígang á liðnu ári greinst með mein. Þar segir hún að spurningin „Hvernig ertu í sálinni?“ sem Friðbjörn krabbameinslæknir hennar spyr hana oft, sé mjög mikilvæg spurning. Spurningin kemur á eftir spurningum um líkamlega líðan enda fylgja oft ýmsar aukaverkanir meðferðum við krabbameini og er gríðarlega mikilvæg að mati Hildar. „Mér hlýnar alltaf að innan þegar ég er spurð þessarar spurningar um leið og hún kemur beint við kvikuna og kallar fram viðkvæmni“ segir Hildur ennfremur og segir spurninguna stóran part af því að ná aftur heilsu því hún brjóti niður streituvaldandi varnarmúra. Þá segir Hildur að „innilegt samtal við aðila sem hefur raunverulegan áhuga á því að vita hvernig þú ert á sálinni þegar líkami þinn er undirlagður af efnavopnum og um leið svo framandi í stríðshamnum, getur verið jafn mikilvægt og lyfjameðferð.“
Hildur Eir segir að krabbameinsfélög á borð við Krabbameinsfélagið, Kraft, Ljósið og fleiri sem veiti sáluhjálp í þessu stríði sem líkaminn er að há við lífshættulegan sjúkdóm, séu ómetanlegar. Hildur hefur notið þjónustu Krabbameinsfélags Akureyrar í baráttu sinni og segist hún óendanlega þakklát.
Umfjöllunina má lesa í heild sinni hér
Athugasemdir