Fjarðabyggð kom sér frá skerðingu á rafmagni til fjarvarmaveitna þann 19. janúar með því að gera samning við Tandrabretti sem framleiðir viðarperlur til kyndingar.
Þann 19. janúar kom til framkvæmda skerðing á rafmagni til fjarvarmaveitna á köldum svæðum á Íslandi og lokað var á afhendingu til kaupenda ótryggrar orku og því lítið annað í boði en olía. Fyrirtækið Tandrabretti á Eskifirði bíður þó upp á annan valmöguleika, viðarperlur (e. pellets), sem er ýmist úr úrgangstimbri eða grisjunarvið úr skórækt á Fljótsdalshéraði. Að sögn Einars Birgis Kristjánssonar, framkvæmdarstjóra Tandrabrettis, eru perlurnar bæði notaðar sem undirburður undir hesta og sem eldsneyti til kyndingar. Í Evrópu er þessi tegund húshitunar stór þáttur í áætlun Evrópusambandsins um kolefnahlutlausa Evrópu.
Fjarðabyggð og Tandrabretti ákváðu að hafa samvinnu um að Tandrabretti myndi reka viðarperlukyndingar í fjarvarmaveitum í Neskaupstað og á Reyðarfirði. Um er að ræða þrjár færanlegar kyndistöðvar í gámum og er hver um sig hálft megavatt eða samtals 1,5 megavatt. Með þessu þarf Fjarðabyggð ekki að brenna jarðefnaeldsneyti í vetur, en kaupir þess í stað hita frá kolefnahlutlausum kyndistöðvum. Þá rekur Tandrabretti einnig kyndistöðvar í Hallormstað og í Fljótsdal.
Það sem er kynnt með fjarvaraveitunum eru Sjúkrahúsið, Verkmenntaskólinn, barnaskólinn, sundlaugin og Egilsbúð á Neskaupsstað. Á Reyðarfirði er það skólinn, leikskólinn og íþróttahúsið.
Athugasemdir