Hákon Stefánsson stjórnarformaður Sýnar hefur ekki svarað ítrekuðum spurningum Mannlífs um það ástand sem er uppi innan fyrirtækisins. Mannlíf spurði Hákon meðal annars hvort stjórn og hluthafar félagsins gengju í takti við Herdísi Fjeldsted forstjóra sem er gagnrýnd fyrir vinavæðingu og að flæma frá sér lykilstarfsmenn. Hákon hefur fengið eftirfarandi spurningar:1. Ganga stjórn og hluthafar í takti við forstjórann?2. Nýtur Herdís Fjeldsted óskoraðs stuðnings hjá þér, stjórn og hluthöfum?3. Kemur til greina að skipta félaginu upp með sölu ákveðinna eininga?
Deildin hennar eins og eftir flugslys
Nýjasta blóðtakan úr starfsmannahópi Sýnar var þegar Kolbrún Dröfn Ragnarsdóttir auglýsingastjóri Sýnar hætti nýverið. Heimildir Mannlífs herma að mikil eftirsjá sé af Kolbrúnu. Hún er sögð hafa rifið upp auglýsingatekjur félagsins.
„Þetta mun þýða að tekjur Sýnar munu lækka umtalsvert þar sem það mun taka langan tíma að finna manneskju sem getur komið í hennar stað,“ segir heimildamaður úr hópi starfsfólks. Sá segir að fólki sé mjög brugðið við brotthvarf hennar og auglýsingadeildin sem lömuð. „Hún er einstaklega vel liðin og er deildin hennar eins og eftir flugslys“.
Herdís forstjóri hefur ekki viljað svara spurningum Mannlífs um málið fremur en stjórnarformaður félagsins. Forstjórinn sendi starfsfólki Sýnar bréf í síðustu viku þar sem hún reyndi að útskýra sína hlið og slá á óánægju starfsmanna.
Hlutabréfaverð í Sýn féll um 35 prósent í fyrra. Þessi þróun heldur áfram og hefur verðið fallið um rúmlega 4 prósent það sem af er þessu ári. Markaðsvirði Sýnar er aðeins um sjö milljarðar króna. Það þykir engan veginn endurspegla verðmæti eignanna sem er talið vera allt að 21 milljarður króna. Vandi félagsins í því samhengi er sá að tiltrú markaðarins á stjórn og framkvæmdastjórn er lítil.
Athugasemdir