Stór hluti æðarvarps á tveimur bæjum við Þistilfjörð fór á kaf í vatn í rigningunum í vikunni. Áætlar bóndinn á Sauðanesi að eitthvað um þrjú hundruð hreiður séu algjörlega ónýt.
„Tvö til þrjú hundruð á að giska. Ég veit um rúmlega 130 hreiður sem ég var búinn að taka dúninn úr. Og ef ég tel með hreiðrin hjá nágranna mínum, það voru allavega 100 hreiður sem flæddu hjá honum líka,“ sagði Ágúst Marinó Ágústsson á Sauðanesi í samtali við RÚV.
Ágúst segir að það hafi flætt yfir varp í landinu sem hann veit lítið um. Honum finnst líklegt að einhverjir tugir hreiðra hafi trúlega eyðilagst þar; segir að í meðalári séu á bilinu 1.200 til 1.400 hreiður í varpinu, þannig að þarna hafi um 10 prósent eyðilagst.
„Fuglinn var flosnaður upp og sat svona í landi bara. Hellingur af blika og kollu. Var auðvitað ennþá að verpa.“
Ágúst reiknar með að kollur sem voru nýbyrjaðar að verpa muni geri það aftur. Hins vegar hafi verið allt upp í 9 egg í hreiðri, en þær kollur verpi ekki aftur.
„Ég var náttúrulega búinn að hirða dúninn úr, þar sem var fyrirsjáanlegt að færi á kaf, þar hirti ég dún úr. Þannig að tjónið er ekki alveg eins mikið kannski. Ég náði dúninum þó. En varpið fór náttúrulega forgörðum.“
Athugasemdir