Stefán Jakobsson, betur þekktur sem Stebbi Jak, söngvari hljómsveitarinnar DIMMU, hefur ákveðið að segja skilið við sveitina eftir 15 ára starf. Ákvörðunin kemur í kjölfar sýknudóms í líkamsárásarmáli og langvarandi álags sem hann segir hafa haft djúp áhrif á líf sitt.
Í færslu á Facebook greinir Stefán frá því að málið hafi staðið yfir í tvö og hálft ár og haft veruleg áhrif á hann og hans nánustu. „Í gær lauk tveggja og hálfs árs óvissutíma með skýrum sýknudóm vegna ákæru um líkamsárás. Ég hafði alltaf trú á að þetta færi vel, en léttirinn að fá þetta staðfest er ólýsanlegur,“ segir hann.
Hann lýsir því jafnframt að sá aðili sem lagði fram kæruna hafi á sama tíma beitt hann og fjölskyldu hans ítrekuðu áreiti og hótunum:
„Í tvö og hálft ár hefur þessi maður beitt mig og fólkið í kringum mig gengdarlausu ofbeld. Má þar nefna fyrrverandi sambýliskonu gerandans, lögfræðinginn minn og eiginkonu mína. Gerandinn hefur hótað mér og mínum óteljandi oft, auk þess sem hann hefur áreitt okkur ítrekað í gegnum sms og tölvupósta.“
Samkvæmt Stefáni náðu hótanirnar einnig til barna hans og tengdra aðila, auk þess sem haft hafi verið samband við vinnustaði og skóla barnanna. Hann segir málið ítrekað hafa verið tilkynnt til lögreglu án þess að gripið hafi verið til aðgerða sem stöðvuðu áreitið.
„Allt hefur þetta verið tilkynnt til lögreglu án þess að nokkuð hafi verið að gert og afleiðingarnar þar af leiðandi engar fyrir gerandann. Okkur var í eitt skipti sagt að hann hefði verið handtekinn og settur í klefa, sem ætti að róa slíka menn. Það var þó ekki vegna hótana í minn garð eða í garð míns fólks, heldur vegna hótana sem hann sendi á almennt netfang dómsmálaráðuneytisins.“
Tengir brotthvarf við stöðu innan hljómsveitarinnar
Í færslunni tengir Stefán ákvörðun sína um að hætta í DIMMU einnig við samskipti innan sveitarinnar. Hann segir að tengsl milli aðila í málinu og fjölskyldu bassaleikara sveitarinnar hafi haft áhrif á samstarfið.
„Umræddur maður sem ég vísa til sem geranda í þessu máli er tengdur eiginkonu Silla Geirdal, sem er bassaleikari DIMMU. Eiginkonan á svo og rekur markaðsfyrirtæki, þar sem gerandinn er skráður sem starfsmaður.“
Stebbi heldur áfram:
„Silli og eiginkonan hans hafa frá upphafi máls tekið skýra afstöðu gegn mér í þessu máli þrátt fyrir að hafa átt við þau ítrekuð samtöl, sem hafa snúist um það að gerandinn er veikur einstaklingur sem augljóslega þarf á aðstoð að halda, kusu þau að setja kíkinn fyrir blinda augað og kenna mér um ófarir þessa manns. Þannig var því haldið fram að ég og mitt fólk söfnuðum hótunum hans saman, einungis með það í huga að geta náð okkur niður á honum síðar. Það þarf ekki að hafa mörg orð um það að við svona aðstæður er ómögulegt að eiga nokkurt samstarf eða samtal. Fólk sem ég taldi vera vini mína hefur brugðist á öllum stigum málsins,“ skrifar hann og bætir við að við slíkar aðstæður hafi reynst ómögulegt að viðhalda samstarfi.
Þung ákvörðun eftir 15 ár
Stefán segir ákvörðunina hafa verið erfiða, enda hafi hann starfað með hljómsveitinni af heilum hug í mörg ár:
„Ég hef starfað með DIMMU af heilum hug í 15 ár. Eftir okkur liggja heilsteyptar plötur, tónleikar og gleðistundir sem skipta þúsundum.“
Hann þakkar jafnframt stuðning aðdáenda í gegnum tíðina og segist ætla að horfa fram á veginn:
„Ég kýs að umvefja mig fólki sem er nærandi en ekki ærandi og tærandi. Ég hlakka því til þess sem framtíðin ber í skauti sér.“
Stefán lýkur færslunni á orðum um mikilvægi þess að sleppa takinu þegar aðstæður krefjast þess og segir ákvörðunina hluta af því að vera sjálfum sér trúr.
Athugasemdir