Mikil óánægja ríkir með útsendingu Ríkisútvarpsins frá sögulegum blaðamannafundi ríkisstjórnarinnar í dag, þar sem niðurstöður þjóðaratkvæðagreiðslunnar þar sem kosið var um hvort hefja skuli á ný viðræður um aðild Íslands að Evrópusambandinu voru kynntar. Össur Skarphéðinsson, fyrrverandi utanríkisráðherra, sparar ekki stóru orðin á opinberri Facebook-síðu sinni og segir stofnunina fá „algera falleinkunn“ fyrir frammistöðuna.
Íslendingar höfnuðu því að taka upp þráðinn í samningaviðræðum við ESB í kosningunum, en „Nei“-hliðin hafði betur með 52,8% atkvæða gegn 47,2%. Niðurstaðan hefur vakið gríðarlega athygli út fyrir landsteinana og fjöldi erlendra fjölmiðla fylgdist náið með fundi ríkisstjórnarinnar.
Gagnrýni Össurar lýtur að því að RÚV ákvað að slökkva á beinni útsendingu sinni um leið og spurningum innlendra blaðamanna lauk, bekkurinn var sleginn og röðin kom að erlendum fréttamönnum.
„Úff, RÚV. RÚV fær algera falleinkunn fyrir blaðamannafundinn með ríkisstjórninni áðan. Þegar einn rúntur spurninga var búinn frá íslenskum fjölmiðlum og erlendir blaðamenn byrja með sínar - þá slekkur RÚV á útsendingunni!!!“ skrifar Össur reiður á samfélagsmiðilinn.
Hann bendir á að almenningur hafi farið á mis við mikilvæg sjónarhorn með þessari ákvörðun RÚV „Það hefði einmitt verið mjög fróðlegt að heyra hvaða sjónarmið speglast í spurningum þeirra. - Hvað er að þessu liði?!“
Athugasemdir