Karlmaður hefur verið dæmdur í 30 daga skilorðsbundið fangelsi fyrir að hóta lögreglukonu ofbeldi þegar hann var handtekinn í tengslum við mótmæli við utanríkisráðuneytið í október 2024.
Maðurinn, Naji B. A. Asar, tók þátt í mótmælum við ráðuneytið 15. október 2024. Samkvæmt dóminum fór hann yfir grindverk og inn á lokað svæði og upp á þakbrún. Lögregla ákvað í kjölfarið að handtaka hann.
Við handtökuna var maðurinn færður í handjárn og gleraugu hans tekin af honum til að koma í veg fyrir að þau skemmdust. Fjórir lögreglumenn báru hann síðan í lyftu til að flytja hann niður í bílakjallara.
Í lyftunni sagði maðurinn við lögreglukonu sem hélt á gleraugum hans: „If I’m not find my glasses I will fuck you.“ Ákæruvaldið taldi að í orðunum hefði falist hótun um ofbeldi.
Maðurinn neitaði sök og sagði fyrir dómi að orðunum hefði ekki verið beint að neinum sérstökum. Merking þeirra hefði að hans sögn verið sambærileg við að segja lögreglumönnunum að fara til helvítis.
Fjórir lögreglumenn sem voru í lyftunni báru hins vegar á annan veg. Dómurinn taldi framburð þeirra samhljóða og trúverðugan um að maðurinn hefði beint orðunum að lögreglukonunni. Hún sagðist sjálf hafa tekið orðunum alvarlega og litið á þau sem hótun.
Dómurinn taldi sannað hafið yfir skynsamlegan vafa að um hótun hefði verið að ræða og sakfelldi manninn fyrir brot gegn valdstjórninni.
Honum var gert að sæta 30 daga fangelsi, skilorðsbundið til tveggja ára. Þá var honum gert að greiða 900 þúsund krónur í málsvarnarlaun.
Athugasemdir