Regnfötin gætu komið sér vel víða um land í dag, enda útlit fyrir talsverða úrkomu á köflum. Þá verður nokkur vindur sunnanlands og vestan, en búast má við töluvert hvassara veðri á Norður og Austurlandi.
Sunnanlands og vestan verður sunnanátt, 5 til 13 metrar á sekúndu, og skúrir. Á Norður og Austurlandi verður suðaustan og austan 10 til 18 metrar á sekúndu og rigning fram undir hádegi. Eftir það dregur úr vindi og úrkomu og léttir til á svæðinu.
Á morgun verður veður öllu rólegra. Þá er gert ráð fyrir suðvestlægri eða breytilegri átt, 3 til 8 metrum á sekúndu víðast hvar. Við suðausturströndina verður þó hvassara, eða 8 til 13 metrar á sekúndu.
Skúrir verða víða á landinu á morgun en úrkomulítið verður á norðaustanverðu landinu fram eftir degi.
Hiti verður á bilinu 6 til 12 stig og verður mildast fyrir norðan.
Athugasemdir