Tófan Stjarna dvelur nú á Mjóeyri á Eskifirði og nýtur mikilla vinsælda meðal gesta og heimamanna. Í rúman áratug hafa yrðlingar sótt á Mjóeyri á hverju vori, alist þar upp í návist fólks og dýra, og haldið aftur til náttúrunnar þegar haustar. Að sögn Antons Bergs Sævarssonar, hjá ferðaþjónustunni á Mjóeyri, hefur Stjörnu tekist óvenju vel að aðlagast lífinu á eyrinni og tileinkað sér siði heimahunda á svæðinu, segir á síðu Austurbrúar.
Sérstakt samband við heimilishundinn
Stjarna sýnir af sér einstaka hegðun og virðist að minnsta kosti að hluta til telja sig vera hund. Hún hefur myndað náið samband við tíkina Skottu, sem hefur tekið henni opnum örmum þrátt fyrir töluverðan stærðar- og aldursmun. Ljósmyndir og myndbönd sem Esther Ösp Gunnarsdóttir tók fyrir markaðsteymi Austurbrúar (Visit Austurland) sýna dýrin að leik, og hefur þessi sjón dregið fjölda ferðamanna á svæðið sem gera sér ferð til þess að fylgjast með samskiptum þeirra.
Snýr aftur til náttúrunnar með haustinu
Dvöl Stjörnu á Mjóeyri er þó aðeins tímabundin. Þegar hausta tekur verða refirnir á svæðinu smám saman sjálfstæðari, fara í lengri leiðangra upp til fjalla uns þeir snúa endanlega til síns heima í náttúrunni. Anton Berg líkir þessu við það þegar mannfólkið vex úr grasi, verður fullorðið og flytur að heiman til að spreyta sig á eigin spýtum.
Á vit frægðarinnar líkt og forverarnir
Dæmi eru um að refir frá Mjóeyri hafi náð landsathygli. Refurinn Jarl ólst þar upp en flutti síðar í Fjölskyldu- og húsdýragarðinn í Reykjavík þar sem hann varð þekktur sem „Spádómsrefurinn Jarl“ og spáði fyrir um úrslit leikja á Evrópumótinu í handknattleik með góðum árangri. Óvíst er hvort Stjarna búi yfir sambærilegri spádómsgáfu, en velt hefur verið upp þeim möguleika að hún gæti spáð fyrir um úrslit leikja á heimsmeistaramótinu í knattspyrnu sem nú stendur yfir. Þangað til það kemur í ljós eru allir velkomnir á Mjóeyri að heilsa upp á Stjörnu.
