Alma Möller heilbrigðisráðherra hefur kynnt áform um heildarendurskoðun á lögum um tæknifrjóvgun.

Markmið endurskoðunarinnar er að uppfæra lagaramma á sviðinu með hliðsjón af kröfum um aukið öryggi og gæði í þjónustu við tæknifrjóvgun, efla jafnrétti og tryggja rétt barna sem getin eru með gjafafrumum til að þekkja uppruna sinn. Þá er jafnframt stefnt að einföldun regluverksins.

Meðal fyrirhugaðra breytinga er að setja skýr ákvæði um takmörkun á notkun kynfrumna frá sama gjafa. Er það talið nauðsynlegt til að draga úr hættu á of nánum skyldleika í ljósi smæðar íslensks samfélags. Samkvæmt tillögunum yrði notkun kynfrumna frá sama einstaklingi takmörkuð við að af þeim verði börn í einni fjölskyldu, eða að hámarki tveimur.

Auk þessa eru fleiri atriði til skoðunar sem munu taka mið af frekara samráði við hagsmunaaðila og almenning áður en frumvarp verður lagt fram á Alþingi.

Drög að breytingum hafa verið birt í samráðsgátt stjórnvalda þar sem almenningi og hagsmunaaðilum gefst kostur á að senda inn umsagnir.

Umsagnarfrestur rennur út 22. maí næstkomandi.