„Þetta eru blendnar tilfinningar,“ sagði Jóhanna Vigdís Hjaltadóttir eftir að hún las síðasta tíufréttatíma RÚV í kvöld.
Starfsfólk fréttastofu RÚV faðmaðist eftir útsendinguna og lokaði þar með 35 ára sögu seinni frétta sjónvarpsins.
Seinni fréttir voru orðnar svo sjálfsagður hluti íslenskrar menningar að Jóhanna Vigdís vísaði til þeirra með kerskni þegar hún titlaði aðra matreiðslubók sína Seinni réttir árið 2009.
Ákveðið hafði verið að leggja niður tíufréttirnar vegna þess að áhorf fólks á línulega dagskrá hefur skroppið saman, um hátt í eitt prósentustig á ári upp á það síðasta.
Í beinni frá Alþingi
Í síðasta fréttatímanum gerði fréttafólk RÚV það sem það hefur nýtt seinni fréttir til öll þessi ár. Þau miðluðu nýjustu fréttum kvöldsins og það með beinni útsendingu. Sunna Karen Sigurþórsdóttir fréttakona var þá stödd í húsnæði Alþingis og tók viðtal við Hildi Sverrisdóttur, þingflokksformann Sjálfstæðisflokksins, og Sigmar Guðmundsson, þingmann Viðreisnar og fyrrverandi starfsmann RÚV, um torfær þinglok. Svo fór að sögu tíufréttanna lauk á undan þinginu.
Tíufréttirnar voru í reynd seinni fréttir sjónvarpsins. Þær höfðu verið á dagskrá frá 1988 þegar aðalfréttatíminn var klukkan átta og þær seinni klukkan ellefu að kvöldi. Árið 1999 voru aðalfréttir fluttar til klukkan 19, og skaut þá fréttatíma Stöðvar 2 ref fyrir rass, sem þá var klukkan 19.19 og voru kenndar við tímasetninguna. Fyrir tilviljun var fyrr í dag sömuleiðis tilkynnt um endalok línulegs áskriftarsjónvarps Stöðvar 2, sem frá því í júní heitir SÝN.
Í tíufréttunum í kvöld var sömuleiðis greint frá nýjustu fréttum í Bandaríkjunum, þar sem Donald Trump forseti náði naumlega í gegn fjárlagafrumvarpi sínu á bandaríska þinginu. Þá sagði frá sænskum embættismanni sem sat í fangelsi í Íran í tvö ár og óttaðist að sjá aldrei fjölskyldu sína á ný. Auk þess voru birtar glefsur úr aðalfréttatímanum, meðal annars myndskeið af sjötíu sjálfboðaliðum flytja bókasafn Skálholtskirkju úr lekum kirkjuturninum. Loks komu íþróttir, þar sem Þorkell Gunnar Sigurbjörnsson sýndi og lýsti mörkum kvöldsins í íslenska fótboltanum.
Fall tíufréttanna
Í síðustu viku horfðu 13% landsmanna á tíufréttirnar að meðaltali. Það var hálfu prósentu meira en áhorf á Kastljósið. Áhorf á tíufréttirnar var 18% í sömu viku ársins fyrir fimm árum, árið 2020. Löngu áður, í janúar árið 2004, mældist áhorfið tæplega 23%, sem er nálægt áhorfinu á aðalfréttatíma RÚV í síðustu viku.
Þegar aðeins er horft til þeirra sem eru undir fimmtugu var áhorfið á tíufréttirnar komið niður í 5%, samkvæmt mælingum Gallup í síðustu viku.
„Góðir áhorfendur. Þessum síðasta tíufréttatíma sjónvarpsins er að ljúka. Og við á fréttastofunni þökkum ykkur kærlega fyrir samfylgdina hér í gegnum áratugina,“ sagði Jóhanna Vigdís, áður en birt var myndskeið úr Stuðlagili undir lagi Mugison, Stingum af. „Með þessum myndum og tónum kveðjum við ykkur með síðasta tíufréttatímann. Veriði sæl.“
Að lokum samfylgdinni ræddi Jóhanna Vigdís við Mannlíf í matsal RÚV. „Við höldum að þetta sé gæfuspor,“ sagði hún. „Af því að við munum þegar líður á færa fréttatímann til klukkan átta. Búa þá til stærri og feitari pakka. Við ætlum að koma í staðinn með meiri þjónustu.”
Fréttatíminn verður þá aftur klukkan átta, en seinni fréttirnar snúa ekki aftur.
