Manchester United hefur látið Ruben Amorim taka pokann sinn. David Ornstein hjá The Athletic greindi fyrst frá ákvörðuninni og félagið staðfesti hana síðar um morguninn, klukkan 10:08 en fotbolti.net sagði frá því fyrst íslenskra miðla.
Amorim hafði stýrt liðinu í rúmlega ár, eða í 14 mánuði, eftir að hann kom til félagsins frá portúgalska liðinu Sporting og tók við starfi Erik ten Hag. Hann átti fund með Jason Wilcox og Omar Berrada fyrr í dag þar sem honum var tilkynnt um brottreksturinn.
Samkvæmt Ornstein mun Darren Fletcher, fyrrverandi leikmaður Manchester United, taka við stjórn liðsins tímabundið. Talið er ólíklegt að félagið ráði nýjan knattspyrnustjóra til frambúðar fyrr en næsta sumar. Fletcher hefur hingað til starfað sem þjálfari U18 liðs félagsins.
Árangur United undir stjórn Amorim var undir væntingum og sigurhlutfallið fór ekki yfir 40 prósent. Eftir jafntefli gegn Leeds í gær hélt Amorim ræðu þar sem hann lagði áherslu á að hann hefði verið ráðinn sem knattspyrnustjóri félagsins, en ekki einungis sem þjálfari liðsins. Heimildir herma að þau ummæli hafi ekki þótt heppileg hjá forráðamönnum United.
Manchester United er nú í 6. sæti úrvalsdeildarinnar með 31 stig að loknum 20 leikjum. Á síðasta tímabili endaði liðið í 15. sæti og laut í lægra haldi í úrslitaleik Evrópudeildarinnar.
Í tilkynningu frá félaginu segir að stjórnendur telji ákvörðunina rétta við þessar aðstæður og að hún eigi að auka líkur á sem bestum árangri liðsins í deildinni þegar líður á vorið.
Darren Fletcher mun stýra liðinu í næsta leik gegn Burnley.
