Jarðeðlisfræðingurinn og fyrrum forsetaframbjóðandinn Ari Trausti Guðmundsson varar við víðtækum áhrifum hraðrar jöklarýrnunar á Íslandi í nýrri Facebook-færslu og segir ljóst að breytingarnar muni snerta bæði náttúru og samfélag.
Í færslunni bendir hann á að hækkandi hitastig og breytt úrkomumynstur valdi því að jöklar landsins hopi hratt og að afleiðingarnar geti orðið margvíslegar ef þróunin heldur áfram.
Hann nefnir meðal annars að vatnsbúskapur landsins muni taka breytingum, þar sem ár geti minnkað eða horfið og nýir farvegir myndast. Þá muni áhrifin einnig ná til orkukerfisins, þar sem vatnsaflsvirkjanir geti eftir tímabundið aukið rennsli farið að framleiða mun minna.
Ari Trausti bendir einnig á að breytingar geti orðið á grunnvatnsflæði og votlendi, auk þess sem stór svæði sem áður voru undir jökli geti orðið að örfoka sand- og leirsvæðum sem gróa hægt upp.
Hann varar jafnframt við aukinni náttúruvá, þar á meðal flóðahættu vegna fleiri jökullóna, tíðari jökulhlaupa og aukinnar hættu á skriðuföllum og berghlaupum. Þá geti hætta á eldgosum undir jöklum aukist með tilheyrandi flóðum og gjóskufalli.
Í færslunni kemur einnig fram að landris geti orðið hratt á jökulsvæðum og að veðurfar geti breyst, meðal annars með aukinni úrkomu og breyttum hitastigi yfir hálendinu. Þá muni ásýnd landsins taka miklum breytingum.
Að mati Ara Trausta er mikilvægt að búa landsmenn undir þessar sviðsmyndir. „Mikilvægt er að búa landsmenn undir þessar „sviðsmyndir“ og aðlaga samfélagið að þeim - stunda þá vinnu af elju, þekkingu og fyrirhyggju,“ segir hann að lokum.
