Inga Sæland, mennta- og barnamálaráðherra, hefur ákveðið að endurskipa Árni Ólason sem skólameistara Menntaskólans á Egilsstöðum til næstu fimm ára frá og með 1. ágúst. Frá þessu er sagt á Austurfrétt.
Fyrri ráðherra málaflokksins, Guðmundur Ingi Kristinsson, hafði áður gefið til kynna að ekki stæði til að skipa Árna aftur í embættið þegar núverandi skipunartímabil rynni út á þessu ári.
Árni tók fyrst við starfi skólameistara haustið 2016, en embættið er skipað til fimm ára í senn. Í desember á síðasta ári sagði Guðmundur Ingi í útvarpsviðtali að fyrirhugað væri að ráða nýjan skólameistara þegar tímabili Árna lyki.
Mennta- og barnamálaráðuneytið sagði síðar að ákveðið hefði verið að auglýsa starfið á ný svo umsækjendur gætu tekið afstöðu til þess hvort þeir vildu leiða skólann í gegnum mögulegar breytingar á framhaldsskólakerfinu. Ráðherra hafði kynnt tillögur að breytingum á kerfinu síðasta haust, þó þær hafi lítið verið til umræðu undanfarna mánuði.
Tvær umsóknir bárust þegar staðan var auglýst í mars, þar á meðal umsókn frá Árna sjálfum, sem hefur nú verið ráðinn áfram.
Í tilkynningu ráðuneytisins kemur fram að Árni hafi starfað við Menntaskólann á Egilsstöðum í alls 34 ár, meðal annars sem íþróttakennari, kennslustjóri, áfangastjóri og síðar skólameistari.
Hann er menntaður í heilsu- og íþróttalífeðlisfræði frá Norska íþróttaháskólanum og hefur einnig kennsluréttindi frá Íþróttakennaraskóla Íslands á Laugarvatni.
