Atli Fannar Bjarkason, útvarpsmaður á Rás 2, hefur birt gamansama yfirlýsingu á Facebook eftir að hafa farið rangt með hvaða vikudagur 17. júní ber upp á í ár í beinni útsendingu Morgunútvarpsins.

Í færslunni segist Atli hafa tilkynnt þjóðinni af „talsverðu sjálfstrausti“ að þjóðhátíðardagurinn bæri upp á sunnudag, þrátt fyrir að dagurinn sé í raun á miðvikudegi.

„Þetta veit ég núna,“ skrifar hann.

Atli segist ekki ætla að fela sig á bak við það að allt geti gerst í beinni útsendingu heldur taki hann fulla ábyrgð á mistökunum.

„Ég hef þegar farið fram á að óháð úttekt verði gerð á störfum mínum í Morgunútvarpinu,“ skrifar hann í kaldhæðnislegum tón.

Þá segir hann andlegt álag vegna úrslitakeppni Tindastóll og Grindavík í körfubolta ekki vera afsökun fyrir mistökunum en Atli Fannar er harðkjarna Króksari.

„Ég get gert betur og mun gera betur,“ skrifar hann.

Atli segir þó að það sárasta við málið sé að hafa „logið upp í opið geðið“ á samstarfskonu sinni, Gunna Dís.

„Sárast í þessu er að ég laug ekki bara upp í opið geðið á þjóðinni, ég laug upp í opið geðið á Gunnu Dís, sem elskar ekkert meira en frídaga í miðri viku.“

Í lok færslunnar biðst hann afsökunar á mistökunum og lofar að gera sitt besta til að þau endurtaki sig ekki.

„Ég lofa að gera allt sem í mínu valdi stendur til að sjá til þess að þessi mistök endurtaki sig ekki og vil biðja Gunnu Dís og þjóðina alla afsökunar.“