Björn Leví Gunnarsson, fyrrverandi þingmaður Pírata, gagnrýnir Morgunblaðið harðlega í nýrri Facebook-færslu í kjölfar ummæla Andrésar Magnússonar blaðamanns um að enginn fjölmiðill geti verið fullkomlega hlutlaus.
Björn Leví segir umræðuna ekki snúast um að ætlast til fullkomins hlutleysis, heldur um að fjölmiðlar leitist við að vera málefnalegir og heiðarlegir í umfjöllun sinni.
„Ég held það sé enginn að biðja um fullkomið hlutleysi. En að minnsta kosti snefil af sjálfsvirðingu gagnvart málefnalegri umræðu,“ skrifar hann.
Hann segir Morgunblaðið hafa sýnt „fullkomna hlutdrægni“ í umfjöllun um fjölmörg mál og telur að blaðið reyni ekki einu sinni að gæta hlutlægni í ákveðnum málaflokkum.
„Það er öllum augljóst sem vilja sjá það að Morgunblaðið er ekki einu sinni að reyna að vera hlutlaust í ákveðnum málaflokkum,“ segir Björn Leví.
Hann gengur enn lengra og heldur því fram að í slíkum málum starfi blaðið fremur sem „keyptur dreifingaraðili“ en sjálfstæður fjölmiðill.
„Í þeim málaflokkum er blaðið ekki fjölmiðill heldur keyptur dreifingaraðili sem setur ekki “auglýsing“ sem merkingu á viðkomandi “fréttir“,“ skrifar hann og tekur fram að það sé hans persónulega mat.
Björn Leví segir jafnframt að ummæli Andrésar um að enginn fjölmiðill geti verið fullkomlega hlutlaus feli í sér útúrsnúning á þeirri gagnrýni sem Morgunblaðið hafi sætt.
„Umræðan snýst ekkert um neina fullkomnun á þeim vettvangi. Hún snýst um að reyna að vera hlutlaus. Hún snýst um að viðurkenna þegar það tekst ekki. Að gera grein fyrir hagsmunaárekstrum. Að gera greinarmun á skoðunum og gögnum,“ skrifar hann.
Hann tekur fram að gagnrýni sín beinist ekki að almennri fréttamennsku eða störfum blaðamanna á gólfinu.
„Ég er að tala um pólitíkina. Nafnlausu pistlana. Allt annað en er skrifað af blaðamönnum á gólfinu sem eru bara að sinna sínu fagi almennt séð mjög vel,“ segir Björn Leví.
Í lok færslunnar bætir hann við að svipaða gagnrýni megi vissulega færa fram á hendur öðrum fjölmiðlum, en að hans mati sé Morgunblaðið komið lengst frá því að reyna að gæta hlutleysis í pólitískri umfjöllun.
