Björn Leví Gunnarsson hnýtir í stjórnsýslufræðinginn Hauk Arnþórsson í nýrri Facebook-færslu.

Fyrrverandi þingmaður Pírata, Björn Leví Gunnarsson segir að Haukur Arnþórsson stjórnsýslufræðingur ætti að lesa stjórnarskrá Ísland en Haukur heldur því fram að Víðir Reynisson, þingmaður Samfylkingarinnar og formaður alsherjarnefndar, hafi brotið stjórnsýslulög með afskiptum sínum af máli Oscars Anders Bocanegra Florez, 17 ára pilts frá Kólumbíu sem sótt hefur um hæli hér við land.

Björn Leví skrifaði:

„Hérna ætti einhver að lesa stjórnarskrá Íslands.
"Útlendingi verður aðeins veittur íslenskur ríkisborgararéttur samkvæmt lögum."
Og eins og allir vita þá er það Alþingi sem er löggjafinn.
Einnig, í lögum um ríkisborgararétt.
"Alþingi veitir ríkisborgararétt með lögum.
Áður en umsókn um ríkisborgararétt er lögð fyrir Alþingi skal Útlendingastofnun fá um hana umsögn lögreglustjóra á dvalarstað umsækjanda. Enn fremur skal Útlendingastofnun gefa umsögn um umsóknina".“

Björn Leví útskýrir síðan ferli umsóknar um ríkisborgararétt:

„Umsókn um ríkisborgararétt fer í gegnum útlendingastofnun áður en hún berst til Alþingis. Raunar er það svo að umsækjendur hafa verið hvattir til þess að senda umsókn sína líka beint til þingsins af því að útlendingastofnun skilaði ekki öllum umsóknum til þingsins. En útlendingastofnun er með allar upplýsingar og gögn um allar umsóknir.“

Segir þingmaðurinn að Víðir hafi því ekki gert neitt rangt þegar hann lét Útlendingastofnun vita um mögulega útkomu í máli Oscars.

„Það er því nákvæmlega ekkert að því að þingmaður eða formaður nefndar segi útlendingastofnun um mögulega niðurstöðu í einhverju máli. Það er allt annað mál hvað stofnunin gerir við þær upplýsingar. Þar er það stofnun og/eða ráðherra sem ber ábyrgð á viðkomandi ákvörðun - samkvæmt lögum.“

Að lokum rifjar Björn Leví upp tvö dæmi um slíka ábyrgð. Segir hann þau mál líkari því sem Víðir sé nú sakaður um en merkilegt sé að ekkert hafi orðið úr þeim málum en þá hafi ráðherrarnir verið Sjálfstæðismenn.

„Hér má rifja upp tvö dæmi um slíka ábyrgð. Þar sem fyrrum dómsmálaráðherrar hringdu í útlendingastofnun (í máli Yazan), annars vegar, og hins vegar í lögregluna (út af partý í Covid).
Þau mál eru líkari því sem Víðir er sakaður um, en ekkert varð úr þeim málum, sem er svo sem ágætlega merkilegt. Þá voru þetta ráðherrar Sjálfstæðisflokksins. Víðir er ekki ráðherra með neitt boðvald yfir neinum þarna. Er ekki að brjóta neinn trúnað né í þeirri stöðu að geta haft óeðlileg afskipti af neinu í þessu.“