Í dagbók lögreglu frá því í gær og nótt er greint frá því að nokkuð hafi verið um almennar hávaðakvartanir í nótt og að ökumenn væru kærðir fyrir hefðbundinn ökulagabrot.

Einn einstaklingur var kærður fyrir að vanvirða íslenska fánann í miðbænum. Þá var tilkynnt um óvelkomna aðila innandyra í Hafnarfirði. Þeim var vísað á brott. Einnig var tilkynnt um ölvaða konu á gangi í Hafnarfirði en hún fannst ekki þrátt fyrir leit.

Aðili handtekinn fyrir að særa blygðunarkennd nágranna sinna en ekki er greint frá nánari upplýsingum varðandi það mál

Lögreglumenn settu upp ölvunarpóst í Reykjavík. Akstur um 240 bifreiða var stöðvaður og voru ökumenn látnir blása. Tveir ökumenn blésu undir refsimörkum og var gert að stöðva akstur. Einn ökumaður reyndist ölvaður og einn ökumaður grunaður um akstur undir áhrifum fíkniefna.