Breki Þór Frímannsson hefur verið dæmdur í átta mánaða fangelsi í Héraðsdómi Reykjavíkur fyrir sérstaklega hættulega líkamsárás, rán, fíkniefna- og vopnalagabrot auk aksturs undir áhrifum fíkniefna. Þetta kemur fram í dómi sem nýlega var birtur á vefsíðu dómstóla.
Breki Þór játaði öll brotin skýlaust fyrir dómi. Meðal þess sem honum var gefið að sök var sérstaklega hættuleg líkamsárás í íbúð í Reykjavík í febrúar 2023 þar sem hann kýldi mann ítrekað í höfuðið og stappaði á höfði hans meðan hann lá í gólfinu. Brotaþolinn hlaut meðal annars sár á höfði og mar á augnsvæði.
Þá var hann sakfelldur fyrir rán sem framið var í desember 2024 í félagi við annan mann. Þar var brotaþola ógnað með hnífi inni í bifreið og neyddur til að millifæra 36 þúsund krónur auk þess sem tekið var af honum reiðufé. Við leit á manninum fannst einnig marijúana í fórum hans.
Auk þess var Breki fundinn sekur um ítrekuð fíkniefna- og vopnalagabrot, meðal annars vörslu amfetamíns, kókaíns, MDMA og metamfetamíns, sem og vörslu hnífa á almannafæri. Hann var einnig dæmdur fyrir að aka undir áhrifum fíkniefna sviptur ökurétti.
Við ákvörðun refsingar leit dómurinn til þess að líkamsárásin hefði verið fólskuleg og beinst að lífi og heilsu brotaþola. Einnig þótti það þyngja refsingu að ránið hefði verið framið í félagi við annan mann. Á móti kom að Breki játaði brotin greiðlega.
Breki var dæmdur til átta mánaða fangelsisvistar og sviptur ökurétti í þrjú ár frá júlí 2027. Þá var gerð upptæk fíkniefni og tveir hnífar sem fundust í hans vörslum.
