Daði Már Kristófersson fjármála- og efnahagsráðherra segir engin ósætti hafa verið á milli sín og Harðar Arnarsonar, sem lét af störfum sem forstjóri Landsvirkjunar í gær.

Daði Már segir í samtali við RÚV, Hörð hafa unnið mikilvægt starf fyrir þjóðina frá því hann tók við fyrirtækinu árið 2009 og segir hann hafa gegnt lykilhlutverki í þróun þess. Hann virði ákvörðun Harðar um að hætta, enda hafi verið farið að líða að lokum ráðningartíma hans.

Ráðherrann telur að áherslumunur hafi verið á milli Harðar og stjórnar Landsvirkjunar, en segir ekki um einstök ágreiningsmál að ræða. Hann vísar til stjórnarinnar þegar kemur að nánari skýringum og segir fjármálaráðuneytið ekki hafa tengst málinu.

Daði Már hafnar því jafnframt að afsögn Harðar tengist kröfu ríkisstjórnarinnar um auknar arðgreiðslur frá Landsvirkjun. Arðgreiðslan hafi verið samþykkt með samþykki Harðar í vor, samhliða breytingum á arðgreiðslustefnu ríkisfyrirtækja.

Hann vísar einnig á bug fullyrðingum um að til standi að selja hlut í Landsvirkjun og segir slíkt ekki verða tekið fyrir á valdatíma núverandi ríkisstjórnar.