Lögreglan á höfuðborgarsvæðinu hafði í nógu að snúast í gærkvöldi og nótt en meðal verkefna voru umferðarslys, meint fíkniefnaakstur og innbrot.

Tilkynnt var um umferðarslys í Reykjavík þar sem einn einstaklingur var fluttur á slysadeild með minniháttar meiðsli. Þá var einn ökumaður handtekinn á vettvangi, grunaður um akstur undir áhrifum ávana- og fíkniefna. Sá var vistaður í fangaklefa að lokinni sýnatöku.

Þá var ökumaður stöðvaður fyrir of hraðan akstur eftir að hafa mælst á 122 kílómetra hraða á klukkustund þar sem leyfilegur hámarkshraði er 80 kílómetrar á klukkustund. Ökumaðurinn var sektaður á vettvangi.

Lögregla hafði einnig afskipti af ökumanni bifhjóls sem reyndist aka ökutækinu án þess að það væri rétt skráð. Þá var viðkomandi jafnframt án gildra ökuréttinda og ekki með viðeigandi öryggisbúnað. Var hann sektaður vegna brotanna.

Tilkynnt var um innbrot í Kópavogi þar sem fjórir aðilar sáust á öryggismyndavélum brjóta sér leið inn í húsnæði. Samkvæmt upplýsingum frá lögreglu flúðu þeir af vettvangi þegar öryggiskerfi hússins fór í gang.

Einnig var annar ökumaður handtekinn grunaður um akstur undir áhrifum ávana- og fíkniefna. Sá var færður á lögreglustöð í hefðbundið ferli lögreglu.