Sjálfstæð og óháð nefnd, sem Reykjavíkurborg skipaði til að kanna starfsemi Vöggustofa Thorvaldsensfélagsins á árunum 1974 til 1979, kynnti í dag niðurstöður sínar. Um er að ræða framhaldsathugun sem gerð var í kjölfar fyrri skýrslu um starfsemi vöggustofa í Reykjavík á árunum 1949–1973.
Niðurstöður nefndarinnar eru í meginatriðum þríþættar. Í fyrsta lagi segir í skýrslunni að ekki verði slegið föstu að börn sem dvöldu á vöggustofunni á tímabilinu 1974–1979 hafi sætt illri meðferð í skilningi laga nr. 45/2022. Í öðru lagi kemur fram að málsmeðferð barnaverndaryfirvalda við ákvarðanir um vistun barna á stofnuninni hafi oft ekki verið í samræmi við gildandi lög. Í þriðja lagi er bent á að opinbert eftirlit með starfseminni hafi verið afar takmarkað og ekki í samræmi við lagakröfur á þessum tíma.
Alls dvöldu 236 börn á Vöggustofu Thorvaldsensfélagsins á árunum 1974–1979. Börn voru ekki vistuð þar eftir febrúar 1979, en þá var stofnunin sameinuð Vistheimili barna að Dalbraut 12 í Reykjavík.
Nefndin telur að aðstæður barna, aðbúnaður, umönnun og möguleikar foreldra til heimsókna hafi verið með betri hætti á þessu tímabili en á árunum fyrir 1967, sem fjallað var um í fyrri skýrslu. Athugunin bendir jafnframt til þess að þá hafi ekki lengur verið við lýði starfshættir sem almennt settu starfsfólki skorður í umönnun barna eða takmörkuðu sérstaklega möguleika þess til að sinna þörfum einstakra barna.
Þrátt fyrir þetta kemur fram að ýmsum þáttum hafi verið ábótavant. Næturvaktir virðast hafa verið fáliðaðar miðað við aldur og þarfir barnanna, og almennt hafi skort faglega greiningu og vinnu til að mæta sérþörfum barna, svo sem barna með fötlun, eldri barna, barna sem komu úr erfiðum aðstæðum eða voru vistuð ítrekað. Þá kemur fram að í sumum tilvikum hafi börn dvalið mjög lengi á vöggustofunni.
Í skýrslunni er einnig sérstaklega fjallað um afdrif barnanna sem vistuð voru á stofnuninni á umræddu tímabili. Þar má finna upplýsingar um hversu mörg börn voru síðar vistuð á öðrum stofnunum eða fóru í fóstur, auk upplýsinga um dánartíðni og tíðni örorku innan hópsins.
Nánari upplýsingar um niðurstöður nefndarinnar, afdrif barnanna og tillögur um úrbætur er að finna í skýrslu nefndarinnar, sem er aðgengileg í heild sinni á vef Reykjavíkurborgar.
