Ellen Calmon, formaður borgarstjórnarflokks Samfylkingarinnar og varaborgarfulltrúi í Reykjavík, sækist eftir 3.–5. sæti í rafrænu flokksvali Samfylkingarinnar sem fer fram 24. janúar 2026. Ellen er menntuð grunnskólakennari með B.Ed.-gráðu, hefur lokið diplómanámi í opinberri stjórnsýslu og er að ljúka meistaranámi í opinberri stjórnsýslu.
„Ellen hefur gegnt fjölmörgum trúnaðarstörfum fyrir Samfylkinguna, meðal annars sem formaður Samfylkingarfélagsins í Reykjavík í þrjú ár, þar á meðal á krefjandi tímum COVID-faraldursins, og setið í framkvæmdastjórn flokksins. Hún hefur jafnframt víðtæka reynslu úr þriðja geiranum, einkum á sviði velferðar-, mannréttinda- og jafnréttismála. Hún var formaður Öryrkjabandalags Íslands í fjögur ár og sat í stjórn bandalagsins í sjö ár, auk þess sem hún hefur starfað markvisst að réttindum fatlaðs fólks og barna og tekið virkan þátt í jafnréttisbaráttu, meðal annars í tengslum við kvennahreyfinguna. Þá hefur hún setið í stjórnum og nefndum bæði innanlands og á alþjóðavettvangi, þar á meðal hjá European Women’s Lobby og European Disability Forum, verið formaður Fjölsmiðjunnar á höfuðborgarsvæðinu, og á í dag sæti í stjórn Lánatryggingasjóðs kvenna,“ segir í tilkynningu hennar.
„Í framboði sínu leggur Ellen Calmon áherslu á jafnrétti, inngildingu og mannréttindi sem grunn að réttlátri og öflugri borg. Hún vill að Reykjavíkurborg sé fyrirmynd í baráttunni gegn mismunun og að algild hönnun verði ávallt grunnviðmið í allri stefnumótun, þjónustu og skipulagi. Sérstök áhersla er lögð á málefni barna, þar sem réttindi þeirra, öryggi og jöfn tækifæri frá upphafi eigi að vera leiðarljós í ákvörðunum borgarinnar, með Barnasáttmála Sameinuðu þjóðanna sem lifandi ramma.
Ellen leggur jafnframt áherslu á sterkt samstarf heimila, skóla og samfélags, öflugar forvarnir gegn ofbeldi með sérstakri áherslu á börn og ungmenni, og aðgengilega þjónustu sem styður við fjölbreyttar fjölskyldur, meðal annars foreldra með annað móðurmál en íslensku. Hún vill byggja upp barnvæna borg í verki, meðal annars með jöfnunartækjum velferðarsamfélagsins, auknum menningar- og frístundatækifærum barna og uppbyggingu barnamenningarhúss að norrænni fyrirmynd.
Þá vill Ellen vinna að aldursvænni og inngildandi borg þar sem eldra fólk getur lifað með reisn, öryggi og virkni alla ævi, með þjónustu sem styður sjálfstætt líf, aukinni félagslegri þátttöku og markvissum forvörnum gegn ofbeldi. Sérstök áhersla er lögð á að ná betur til eldra fólks með annað móðurmál en íslensku og tryggja að enginn verði ósýnilegur í þjónustu borgarinnar.
Í borgarskipulagi og stjórnsýslu vill Ellen efla virkt lýðræði, endurvekja íbúaráðin og styrkja reglulegt samráð við íbúa í hverfunum. Hún leggur áherslu á sanngjarnar og sjálfbærar lausnir í umferðarmálum, þar sem lífsgæði, heilsa, umhverfi og réttlát nýting borgarrýmisins eru í forgrunni, og að íbúar fái raunverulegt val og áhrif á þróun nærumhverfis síns.“
