Inga Sæland segir fals og hræðsluáróður einkenna málflutning stjórnarandstöðunnar er kemur að mögulegri hækkun veiðigjalds.

Hún vill að fólk leggi við hlustir er kemur að þessu máli er varðar veiðigjaldið því henni finnst málflutningur stjórnarandstöðunnar einkennast af grímulausri „hagsmunagæslu stjórnarandstöðunnar gegn eðlilegu og leiðréttu veiðigjaldi.“

Inga færir í tal að þingmaður Sjálfstæðisflokksins, Jón Gunnarsson tali „um skerðingu eignarréttar“ og spyr hann hvort hann sé að að segja að „kvótakóngarnir eigi sjávarauðlindina?“

Hún bætir svo þessu við:

„Í stað þess að gleðjast yfir því að sveitarfélögin fái hundruði milljóna þegar upp verður staðið i auknar tekjur með viðbótar og eðlilegum gjöldum fyrir aðgang að auðlindinni okkar og endurreisn á mölbrotunum innviðum sem við fengum í arf frá fyrri ríkisstjórn nei, ó nei þá hrópa þeir og arga eins og við séum að koma öllu í kalda kol. Ömurlegt að verða vitni að öðru eins.“

Inga segir að ríkisstjórnin sé með það að markmiði „að vinna landi og þjóð til heilla og við munum koma veiðigjöldunum í lýðræðislega atkvæðagreiðslu í þinginu. Stjórnarandstaðan er ekki með neitunarvald á Alþingi Íslendinga. Hún tapaði í síðustu kosningum og einfaldlega verður að kyngja því að hafa misst völdin“ segir Inga að lokum.